Ekonomıka etnosqa bólinbeıdi

DAMÝDYŃ SYRY – BIRLIKTE, TABYSTYŃ SYRY – TIRLIKTE

N.Á.NAZARBAEV: «Damýdyń syry – birlikte, tabystyń syry – tirlikte» ekenin barshańyz bilesizder. Muratqa jolyn tapqan jetedi. Eńbegimizdiń janbaǵy bizdiń ortaq úıimizdi beıbitshiliktiń besigi etip, bardy baǵalaı bilýimizge baılanysty. Qazaqty qasıetti qarashańyraqqa balasaq, elimizdegi barsha etnos­tar – sol shańyraqqa shanshylǵan ýyqtar. Qazaqstan halqy Assambleıasynyń HHI sessııasynda sóılegen sózinen. Meni Elbasy Nursultan Na­zarbaevtyń ár kezeńderde jańa memleket pen egemen el azamattary aldynda turǵan qadaý-qadaý mindetterge qatysty naqyl sózge bergisiz qysqa da nusqa, dál de naqty aıtqan sózderi árkez tánti etedi. Keshegi ótkizilgen Assambleıa sessııasynda da oıly obrazǵa bóleı otyryp aıtqan Elbasynyń tereń tujyrymǵa toly qaǵıdattaryn súısine tyńdadym. Aıtalyq, birlik «Qazaqstan-­ 2050» Strategııasyn júzege asyrýdyń sheshýshi faktory ekenin kórsetken Elbasy budan keıin: «Bizdiń ekonomıkamyzda eshkim etnosyna qarap bólinbeıdi», dep túıin túıdi. Bul júrekterge birden jol taba alatyn beıneli de bederli sóz ekenine otandastarymyzdyń bári de kelisetin shyǵar. Memleket basshysynyń bul oıly sóz tirkesin men sol sátte qoıyn dápterime túrtip aldym. Iá, qazirgi kúni qazaqstandyq­tar­dyń deni kóp etnosty ujym­darda eńbek etedi. Solardyń biri – bizdiń «Aıdana» JShS. Alaıda, osyǵan qaramastan, olar­dyń qaı-qaısysyna da etnostyq jiktelýshilik úrdisi múldem jat. Biz muny ujymdyq jáne óndiristik tájirıbemizden kórip júrmiz. El ekonomıkasynyń damýy jáne ómir súrý deńgeıi men sapasynyń artýy úshin olardyń bári de ortaq jaýapkershilik arqalaıdy. Barlyq jerdegideı bizdiń Oral óńirinde de shaǵyn jáne orta bıznesti órkendetý isinde qol jetken tabystar az emes. Sonyń báribir jaǵadan bas, bir jeńnen qol shyǵara bilgen aýyzbirshilik pen yntymaqtastyqtyń nátıje­si. Eń jaqsy damyǵan memleket­ter­diń otyzdyǵyna ený – barsha qazaqstandyqtardyń ortaq maq­saty desek, buǵan da jumǵan judyryqtaı jumyla kirisken is kerek. Bizdiń osyndaı birlik pen tirlik úlgisin kórsetip júrgenimiz de jaı aıtyla salatyn sóz emes. Qazaqstan ekonomıkasy – bólshektelmeıtin, bólinbeıtin birtutas ekonomıka. Onyń deńgeıi de osyndaı sıpatyna oraı res­pýblıka azamattary birlese, tize qosyp qımyldaǵan kezde ǵana odan ári tulǵalanyp, damı túsetinine kúmán joq. Sessııada sóılegen sózinde, ekonomıka etnosqa bólin­beıdi dep tujyrym jasaǵan Nursultan Ábishulynyń oıly da obrazdy sóziniń qadir-qasıeti men qundylyǵy da osyndaıda odan ári bıikteı beredi dep oılaımyn. Sondaı-aq, barlyq qazaq­stan­dyqtar men respýblıkadaǵy barlyq etnostar Jalpyǵa Ortaq Eńbek Qoǵamyn qalyptastyrý kezinde de bir tuǵyrdan tabylsa, bul qoǵamnyń bási soǵurlym arta túsedi. Ári mundaı faktor eldegi turaqtylyq pen kelisimniń oıdaǵydaı iske asýynyń da bas­ty bir kórinisi. Osylaısha Pre­zı­dent birlik pen «Qazaqstan-2050» Strategııasyn iske asyrý uǵym­daryn bir, ózara teń qatarǵa qoıa­dy. Sonymen birge, Elbasy osy úndestikti tereńdetken altyn­shy tarmaqta búkil Qazaqstan eńbek, jaýapkershilik jáne tártip arqy­ly ǵana damı alady dep oı túıdi. Biraz jyldardan beri óndiris, shaǵyn jáne orta bıznes salasynda qyzmet atqaryp júrgendikten, osy máselelerge qatysty Memleket basshysynyń sessııada aıtqan sózderi qanat bitirgendeı kúı keshtim. Ári osyndaı órshil sezim kúıi jetegimen kókeıge kelgen keıbir oı-pikirimdi Otanymyzdyń bas gazeti oqyrmandarymen bóliskendi jón kórdim. Avetık AMIRHANIаN, Oral qalasyndaǵy «Aıdana» JShS-niń dırektory, Oral qalalyq máslıhatynyń depýtaty. ORAL.