Balalar jylynyń bazarlyǵy toı-dýmanmen shektelmese kerek. Osyny eskergen Ekibastuz qalasyndaǵy Estaı atyndaǵy balalar mýzyka mektebiniń ujymy erekshe oıyndy oılap tapty. «Kúı ańyzdary» atty ulttyq naqyshta bezendirilgen kompıýterlik oıyn balalardyń qumaryn qandyryp qana qoımaı, kúı qudiretin sezinýge septigin tıgizbek.
Búginde balalarǵa arnalǵan kompıýterlik oıyndar kóp. Paıdalysy az. Qan-josa tóbeles, kisi óltirýmen órbıtin oıyndar jetkinshekterdiń júıke júıesine keri áserin tıgizetini ras. Oıynnan utylyp qalyp, qabyrǵadaǵy túsqaǵazdardy tyrmalaıtyn búldirshinderdi de estidik.
Estaı atyndaǵy balalar mýzyka mektebiniń dırektory Medǵat Manapovtyń aıtýynsha, erekshe oıyn pedagogterge balalarmen ónimdi jumys isteýge múmkindik beredi.
– Qazirgi balalardyń oqý júktemesi kóp. Ata-analardyń qalaýymen orta mektepten keıin qosymsha bilim berý uıymdaryn jaǵalaıdy. Odan sharshap shyqqan oqýshy sport úıirmesine, odan qala berdi mýzyka úıirmesine barady. Mundaı kezde sharshaǵan balamen jumys isteý qıyn. Tyǵyryqtan shyǵý úshin áriptesterimizben birge oıyn jobasyn qurastyrýdy qolǵa aldyq. Oǵan sáıkes, balalarǵa tapsyrma beriledi. Ázirge 3-4 kezeń qarastyrylǵan. Tapsyrmany oryndaý kezinde ańyzdyń jelisimen kúı shertilip, shyǵý tarıhy baıandalady. Osylaısha, oıyn barysynda bala kúıdi qalaı meńgergenin sezbeı de qalady. Oǵan kózimiz jetti. Alǵashqy kúni-aq tyń ádis-tásildiń nátıjesin kóre bastadyq. Balalardyń yntasy arta tústi, – deıdi Medǵat Manapov.
Ázirge jobada «Aqsaq qulan» kúıi ǵana bar. Aldaǵy ýaqytta tapsyrmalardyń sany artyp, sáıkesinshe ózge de kúıler toptastyrylmaq. Kúıden bólek, klassıka sııaqty janrlardy da oıynǵa engizý josparlanyp otyr.
Ádette dombyra synybynyń tárbıelenýshilerine kúıdi tanystyrý úshin eń áýeli onyń shyǵý tarıhy, qurylymy aıtylyp, sodan keıin ǵana notalary úıretiledi eken. Endigi jerde oıyn arqyly teorııalyq bilimdi meńgertý jeńildegenin atap ótken jón. Ustazdar praktıka isine basymdyq beretin bolady. Bul ádis tek dombyra synybynyń qatysýshylaryna ǵana emes, mýzyka mektebiniń barlyq tárbıelenýshilerine arnalǵan. Joba avtorlarynyń kózdegeni de sol. Kez kelgen úıirmege qatysýshynyń oıyn arqyly kóńil kúıi kóterilip, sabaqqa degen yntasynyń artýy mańyzdy.
Oıyn jobasyn qurastyrýshylardyń qatarynda mýzyka mektebiniń dırektory Medǵat Manapov, kitaphanashy Samal Ábikeeva, baǵdarlamashy Sultan Baltashev jáne dybys jazýshy qyzmetin usynǵan jergilikti ánshi Baýyrbek Bektemirov bar. Qazirdiń ózinde ózge óńirlerdegi áriptesteri baılanysqa shyǵyp, oıyn jobasyna qyzyǵýshylyq tanytyp jatqan kórinedi. Ata-analar da mýzyka mektebi basshylyǵynyń úıirme jumysyna atústi qaramaı, jan-jaqty áreket etip jatqanyna dán rıza. Balalar oıynnan utylsa da, kúıdi meńgerýden utylmaq emes.
Pavlodar oblysy,
Ekibastuz qalasy