Bul áserli oqıǵa týraly «áskerıler aqtaýlyq bes jasar egizderdiń armanyn oryndady» deýge de bolady. Bes jasar egizder Janarys pen Bekarystyń ákesi – áskerı qyzmetshi. Ol otbasyna kelgende kóńilin qýanyshqa bóler egiz ulynyń armany áskerı teńizshi bolý ekenin kópten bilip júrgen.
Shırek ǵasyr tájirıbesi bar joǵary shendi áskerı qyzmetshi 1 maýsym merekesi qarsańynda balalarynyń armany týraly Qazaqstan Áskerı-teńiz bazasynyń qolbasshylyǵyna aıtady. Teńizshiler «bolashaq áriptesterimen» kezdesýdi arnaıy balalardy qorǵaý kúnine uıymdastyryp, búldirshinderdi tarıhı áskerı-teńiz murajaıyna qonaqqa shaqyrdy.
– Janarys pen Bekarys Áshirbaevtar teńiz jaıaý áskerinde qyzmet etkisi keledi. Merekege oraı olar ata-anasynan kólik nemese velosıped emes, teńiz formasyn surady. Balalar oıynshyq kemelermen oınap, teńiz týraly mýltfılmder kóredi eken. Olardyń ákesi podpolkovnık Serik Álıev áriptesterimen balalarynyń erekshe ótinishimen bólisken. Al áriptesteri óz kezeginde, balalardyń osy qyzmetke qushtarlyǵyn kórip, tarıhı áskerı-teńiz murajaıyna barýǵa shaqyrdy, – deıdi Aqtaý garnızony baspasóz qyzmetiniń jetekshisi Nurbol Shalabaev.
Balalar murajaıǵa anasy arnaıy tigip bergen áskerı formada barǵan. Olarǵa ekskýrsııada murajaıdyń, áskerı-teńiz kúshteriniń tarıhy týraly aqparat berildi.
– Eger balalar mektepte jaqsy oqıtyn bolsa, onda biz olar úshin eń basty tosyn syı – naǵyz áskerı kemege aparýǵa daıynbyz, – dedi áskerı bólim komandıri Danııar Haırýshev.
Egiz uldarǵa qarap Qazaqstannyń bolashaq myqty, otansúıgish, eljandy, qyzmetshileri ósip keledi deýge tolyq negiz bar.
Mańǵystaý oblysy