Shet aýdanynda jergilikti bilim bóliniń uıymdastyrýymen «Balalar jyly» aıasynda aýqymdy is-shara ótti, dep jazady Egemen.kz.
Kenttegi stadıondy halaıyqqa lyq toltyrǵan bul jıynda ártúrli shyǵarmashylyq baıqaýlarda, sporttyq jarystarda júldeli oryndar alyp, aýdan men oblystyń mereıin asqaqtatyp júrgen shákirtterge syı-qurmet kórsetildi.
Atap aıtqanda, Máskeý qalasynda onlaın rejiminde ótken halyqaralyq «Matematıka jáne jobalaý» konkýrsynyń III dárejeli dıplom ıegeri, Almaty qalasynda ótken О́mirbek Joldasbekov atyndaǵy matematıka jáne mehanıkadan halyqaralyq ǵylymı jobalar konkýrsynyń qola júldegeri J.Aqylbaev atyndaǵy mektep-gımnazııanyń 10-synyp oqýshysy Arýjan Temirlan «Jas ǵalym» atalymy boıynsha, Qanıpa Bitibaeva atyndaǵy respýblıkalyq qazaq tili men ádebıeti pánderi olımpıadasynyń qola júldegeri J.Aqylbaev atyndaǵy mektep-gımnazııanyń 9-synyp oqýshysy Arýjan Tóleýtaeva «Olımpıada juldyzy» nomınasııasy boıynsha marapattaldy.
Al «О́nerli ónerpaz» atalymy boıynsha Aqsý-Aıýlydaǵy S.Muqamedjanov atyndaǵy balalar óner mektebiniń vokal synybynyń 5-synyp oqýshysy Nuraılym Aıbekova oblystyq «Týǵan elime myń alǵys» atty patrıottyq ánder baıqaýynda 1-oryn alǵan jetistigi úshin syı-qurmet kórse, Shymkentte ótken asyq atýdan Ulttyq mektep lıgasy el chempıonatynda qola júlde alǵan Álıhan negizgi orta mektebiniń 7-8-synyp oqýshylary Hanshaıym Turymtaı, Raýan Jeńis, Ińkár Bataı, Gúlsaıa Májıt, Inabat Májıt «Sport sańlaqtary» nomınasııasy boıynsha marapattaldy.
Sondaı-aq, «Oqýlar jeńimpazy» atalymynda oblystyq «Ilııas oqýlarynyń» 1-oryn ıegeri jáne Taldyqorǵan qalasynda ótken respýblıkalyq «Ilııas Jansúgirov oqýlaryna» qatysyp, yntalandyrý syılyǵyna ıe bolǵan Kıikti aýylyndaǵy S.Muqamedjanov atyndaǵy jalpy bilim beretin mekteptiń 11-synyp oqýshysy Ersultan Nurtaı úzdik shyqty.
Budan bólek, qamqorshylyq pen qorǵanshylyq patronattyq tárbıedegi tórt balaǵa da syı-sııapat jasaldy.
Shet aýdanynyń jaqsy atyn oblys pen el kóleminde shyǵarǵan ul-qyzǵa jergilikti kásipkerlerdiń demeýshilik etýimen velosıpedter syıǵa tartyldy. Jomar jandardyń qatarynda «Tazalyq» JShS dırektory Ǵazız Ámirov, aýdandyq kásipodaq uıymynyń tóraǵasy Qaırat Bıǵojı, jeke kásipkerler Murat Ábenov, Qaırat Qanjanov, Ásel Myrzaǵalıeva, Anarııa Isına, Meırambek Ospanov, Aıdyn Telpekbaev, Almas Áýpeshov, Maqpal Sáttibaeva jáne basqalar boldy.
Shet aýdandyq bilim bóliminiń basshysy Eldos Smaǵulov qaıyrymdy isten qaǵys qalmaı, eldiń erteńine balaǵan jas óskinniń aldynda jolynan jyǵylmaǵan jomart jandarǵa alǵys aıtyp, rızashylyǵyn bildirdi.
Odan keıin, aýdandyq ákimdik tarapynan balalarǵa bazarlyq retinde tegin balmuzdaq taratyldy.
Merekelik jıynnyń sońyna taman jıylǵan qaýym ónerli balalar salǵan ásem ándi tyńdap, myń buralǵan bıdi tamashalap, joǵary deńgeıde uıymdastyrylǵan is-sharaǵa rızashylyqpen tarasty.