28 aqpanǵa qaraǵan túni Almaty halyqaralyq áýejaıynda Olımpıada chempıony Mıhaıl Shaıdorovty saltanatty qarsy alý rásimi ótti. Ushaq reısi keshikse de, jankúıerler taramaı, óz chempıonyn kútip aldy, dep habarlaıdy Egemen.kz.
Túngi ýaqytqa qaramastan, áýe aılaǵynyń halyqaralyq termınalynda týǵan-týystary, dostary, jýrnalıster jáne jankúıerleri qarsy aldy.
Tarıhı júldeniń ıegeri týǵan qalasynyń turǵyndaryna alǵys aıtyp, olardyń qoldaýyn erekshe sezingenin atap ótti.
Dástúr boıynsha chempıonǵa qymyz ben ystyq baýyrsaq usynyldy. Osy sátte mánerlep syrǵanaýshynyń janynda ákesi Stanıslav Shaıdorov pen Qazaqstannyń mánerlep syrǵanaý quramasynyń bas bapkeri Asem Kasanova boldy.
Jınalǵan qaýymǵa sóz sóılegen Mıhaıl tolqynysyn jasyra almaı, qazaqstandyqtarǵa kórsetken erekshe qoldaýy úshin taǵy da rızashylyǵyn bildirdi.
«Meni emosııa kernep tur. Arnaıy kelip, meni kútip alǵandaryńyzǵa raqmet. О́te qýanyshtymyn. Súıikti qalama kelip, sizderdiń osyndaı jyly lebizderińizdi kórý – men úshin sózben aıtyp jetkize almaıtyn dúnıe!» dedi Shaıdorov jankúıerlerine.
Aıta keteıik, saltanatty shara sońynda sportshyǵa erekshe syılyq tabystaldy. Tanymal qazaqstandyq sýretshi Asel Sabyrjanqyzy Mıhaıl Shaıdorovqa onyń kilemge toqylǵan portretin syıǵa tartty. Aıta keteıik, bul biregeı týyndyny jasaý barysynda sýretshi qylqalamnyń ornyna konkı paıdalanǵan.
Aıta keteıik, 25 aqpan túni Astana halyqaralyq áýejaıynda Olımpıada chempıony Mıhaıl Shaıdorovty jankúıerleri kútip aldy. Elge oralǵan boıda Mıhaıl Shaıdorovqa úsh bólmeli páter berilse, Sofıa Samodelkına men jattyqtyrýshysyna bir bólmeli páter syıǵa tartyldy.
Prezıdent Mıhaıl Shaıdorovty II dárejeli «Barys» ordenimen marapattady