ShYMKENT. 22 sáýir. Ońtústik Qazaqstan oblysyndaǵy «Saıram-О́gem» ulttyq tabıǵı saıabaǵy aýmaǵynda qar barysy paıda boldy. Olardyń sany edáýir óse túsken. Bul týraly «24kz» habarlady.
Keıingi 50 jyldyń ishinde tuqymy quryp bitýge jaqyn dep sanalyp júrgen qar barysynyń qazaq jerinde boı kórsetýi, árıne, jaǵymdy jańalyq ári úlken qýanysh. «Saıram-О́gem» ulttyq saıabaǵynyń qoryqshylary túz taǵysynyń ata-jurtyna qaıta oralýyn jaqsylyqqa joryp, kóńilderi kóterilip, ony jalma-jan beıne kameraǵa túsirip ala qoıady.
Dálirek aıtqanda, teńiz deńgeıinen 4 200 metrden astam bıiktikte onalasqan «Saıram-О́gem» saıabaǵynyń Saryaıǵyr shatqalynan qylań bergen qar barysyn alǵash ret qoryqshy Nurjan Aqynbekov kezdestirgen.
Nurjan Aqynbekov: «Qar barysy meni kórgende úrkip nemese bóten qylyq kórsetken joq. Asyqpaı, jan-jaǵyna beıqam qarap kete bardy. Quıryǵy óte uzyn. Júni úlpildek. Túsi tarǵyl-tarǵyl boly keledi eken», – deıdi.
«Saıram-О́gem» ulttyq saıabaq qyzmetkerleri 2009 jyldan bastap jabaıy ańdardy zertteýmen aınalysyp keledi eken. Osy aralyqta olar qar barysynyń izin kórgenimen ózin kezdestire almapty.
Tabıǵattyń tákappar da sulý jaratylysy – qar barysynyń qazaq jerine oralýyn atalǵan qoryqtyń qyzmetkerleri úlken jetistik dep sanaıdy.
Osy oraıda, «Saıram-О́gem» janýarlar dúnıesi ósimin molaıtý bóliminiń bas mamany Farıd Halılov degen azamat: «2013 jyldyń qarasha aıynyń sońynda memlekettik qoryqshylar Qyrǵıly shatqalynan onyń iz kórgen. Biz qondyrǵylardy sol jaqqa qaraı aýystyryp qoıdyq. Osylaısha taýǵa betkeılep shyǵyp bara jatqan qar barysyn qazirgi elimizdiń tarıhynda tuńǵysh ret beıne kameraǵa túsirip aldyq. Bul 2014 jyldyń 21 naýryzy bolatyn», – dedi.
Sońǵy jyldary park aýmaǵynda adam aıaǵy baspaıtyn jerlerde ǵana ósip kóbeıetin Qarataý arqary, taýeshki men elik, aıý men kemirgishterdiń sany artqan. Munda óte sırek kezdesetin ular men qara láılek te bar.
149 myń gektar aýmaqty alyp jatqan ulttyq saıabaq aýmaǵynda qar barysynyń taǵy bir analyǵy men kúshigi mekendeıdi eken. Qoryqshylar qar barysynyń qoregi kóp aýmaqta turaqty mekendep, sany kóbeıetinine senimdi.
Joldybaı Bazar.
Derekkóz: «24kz».
Foto: Joyreactor.cc.