Qazirgi ýaqytta elimizde bıylǵy eń negizgi Ulttyq biryńǵaı testileý synaǵy ótip jatyr. Talapkerlerdiń arasynda joǵary nátıje kórsetkender de, ereje buzǵandar da bar.
Negizgi testileý ótken aıdyń ortasynda, anyǵy 16 mamyrda bastalǵan bolatyn. Talapkerler 5 shildege deıin test tapsyrady, óıtkeni olar testileý orny men ýaqytyn ózderi tańdady. Osy oraıda «Aralyq qorytyndy qandaı?» degen suraq týady. Ulttyq testileý ortalyǵynyń deregine súıensek, negizgi testileý bastalǵannan beri qatysýǵa ótinish bildirgen 2 90 myńǵa jýyq talapkerdiń 90 myńnan astamy test tapsyrypty. Olardyń ishinde túlekterdiń 74,7%-y qazaq, 25,2%-y orys, 0,1%-y aǵylshyn tilinde testileýden ótti. Test tapsyrǵandardyń 67%-ǵa jýyǵy shekti ball jınady. Al ortasha ball 65-ti qurady.
Akademııalyq adaldyqty saqtaý maqsatynda talapkerlerdiń test nusqasy tańbalandy. Iаǵnı árbir UBT qatysýshysynyń jeke test nusqasy bolady. Erejelerdi buzǵan jáne test tapsyrmalaryn aýdıtorııadan shyǵarýǵa talpynǵan testilenýshilerdiń nátıjeleri joıylady. Ulttyq testileý ortalyǵynyń dırektory Rýslan Emelbaev negizgi testileý merzimi aıaqtalmasa da, óz ornyna basqa adamdy kirgizý faktisi tirkelip úlgergenin jetkizdi.
«Byltyr Face ID júıesi men baqylaýdy kúsheıtýdiń nátıjesinde bógde adamdardy kirgizýge tyrysqan 18 jaǵdaı anyqtalǵan edi. Bıyl biz alǵash ret bóten adamdardy kirgizýge tyrysý faktisin tirkedik. UBT-nyń úshinshi aptasynda qatysýshy óziniń ornyna basqa jeke tulǵany jibergen. Buǵan tıisti is-sharalar qabyldandy, testilenýshi men testileýge kirýge talpynǵan bógde tulǵa boıynsha derek quqyq qorǵaý organdaryna jiberiledi», dedi R.Emelbaev.
Ortalyq ókiliniń málimdeýinshe, 119 talapker smartfon, shpargalka jáne basqa da tyıym salynǵan zattardy alyp ótkisi kelgeniniń saldarynan test tapsyra almady. Testileý kezinde erejelerdi buzǵany úshin aýdıtorııadan 118 adam shyǵarylyp, olardyń nátıjeleri joıyldy.
Aldaǵy ýaqytta test tapsyratyn talapkerlerdiń esine sala keteıik, UBT-ǵa kirgizý úsh deńgeıli júıe boıynsha júzege asyrylady. Aldymen Face ID jeke basyn sáıkestendirýden ótedi. Sodan soń jeke kýálik boıynsha tekserilip, keıin otyrǵyzý ornynda taǵy jeke basyn sáıkestendirý júrgiziledi. Buǵan deıin testileý prosesin ár kompıýterdiń joǵarǵy jaǵynan baqylap turatyn bir kamera ǵana bolsa, endi testilenýshiniń jeke basyn sáıkestendiretin, sondaı-aq bógde adamdardyń kirýine jol bermeıtin ekinshi (frontaldy) kamera ornatylǵan. Eger testileý nátıjesi kóńilden shyqpasa, talapkerler test tapsyryp bolǵannan keıin 30 mınýt ishinde apellıasııaǵa bere alady. Sertıfıkat apellıasııa týraly sheshim qabyldanǵan soń testilenýshiniń jeke kabınetinde qoljetimdi bolady.
Ulttyq testileý ortalyǵynyń habarlaýynsha, talapkerlerdiń, sonyń ishinde erekshe bilim berý qajettilikteri bar talapkerlerge UBT tapsyrý ýaqyty 40 mınýtqa uzartyldy. Sonymen qatar olar úshin arnaıy syzba jáne dıagrammalarsyz suraqtar jasaldy. Qabyldanǵan sharalardyń nátıjesinde erekshe bilim berý qajettilikteri bar test tapsyrýshylar sany artyp keledi. Eger 2021 jyly negizgi UBT-ǵa 90 bala qatyssa, bıyl úsh apta ishinde testileýge erekshe bilim berý qajettiligi bar 310 bala test tapsyrdy.
Bıyldan bastap talapkerlerge yńǵaıly bolý úshin UBT-nyń kúnin, ýaqytyn, orny men beıindi pánderin eske salatyn SMS joldanatyn boldy. Habarlama UBT-ǵa qatysýshylardyń ózderine, sondaı-aq kámelet jasqa tolmaǵan testilenýshilerdiń ata-analaryna nemese zańdy ókilderine jiberiledi.
Bıylǵy negizgi testileýde joǵary ball jınaǵandar bar. Sonyń biri – Túrkistan oblysynan qatysqan Madına Jumadolla. Ol testileý suraqtarynyń mektep baǵdarlamasynan kelgenin aıtady.
«Bul UBT osyǵan deıin qańtar, naýryz aılarynda tapsyrǵan testileýge qaraǵanda kúrdeli boldy. Degenmen test suraqtarynyń barlyǵy mektep baǵdarlamasynda ótken, kitaptan oqyp daıyndalǵan taqyryptardan keldi. Sondyqtan maǵan UBT qatty qıynǵa túspedi. Árıne, testileý kezinde qobaljyǵanymmen, ózimniń joǵary ball jınaıtynyma senimdi boldym. Arnaıy onlaın kýrsqa jazylyp, jyl boıyna úzdiksiz daıyndaldym. Bárinen buryn ózim oqyǵan «Daryn» mektebi jaqsy bilim bazasynyń qalyptasýyna kómektesti. Mekteptiń bergen bilimi men qosymsha kýrsqa qatysyp daıyndalýdyń nátıjesinde osyndaı nátıjege jettim. Tańdaý arqyly hımııa, bıologııa pánin tańdadym, sebebi jalpy medısına baǵyty boıynsha oqýǵa túsýdi josparlap otyrmyn. Al ýnıversıtetti áli naqty tańdamadym», deıdi M.Jumadolla.