О́tken aptada Almatyda Qaınar ýnıversıtetiniń uıymdastyrýymen Qazaqstannyń eńbek sińirgen qaıratkeri, zań ǵylymdarynyń doktory, Uly Otan soǵysynyń ardageri Zaıyrhan Ashıtovtyń 90 jasqa tolýyna arnalǵan «Qazaqstan-2050» Strategııasy mindetterinen týyndaıtyn quqyqtyq bilim berý salasyn damytýdyń ózekti máseleleri» atty respýblıkalyq ǵylymı konferensııa bolyp ótti.
Konferensııa jumysyn kirispe sózben ashqan Qaınar ýnıversıtetiniń rektory, professor Erenǵaıyp Omarov stýdent jastarǵa quqyqtyq bilim berýde, quqyqtyq tárbıeni jetildirýde elimizdiń joǵary oqý oryndarynyń aldynda turǵan mindetterdi atap ótip, osynaý kókeıtesti máselelerdi sheshýde otandyq zańgerlerdiń róli erekshe ekendigine keńinen toqtaldy.
– Konferensııanyń professor Qaıyrhan Ashıtovtyń 90 jyldyq mereıtoıyna oraılastyrylyp ótkizilýiniń ózi de zańger ǵalymnyń táýelsiz Qazaqstannyń quqyǵy boıynsha jazylǵan 10-nan astam monografııalyq eńbekter men oqýlyqtardyń avtory retinde jastardyń quqyqtyq saýattylyǵyn arttyrýda atqarǵan eńbekterine degen qurmettiń bir kórinisi , – dep sózin aıaqtady, sheshen.
Konferensııada, «Quqyqtyq bilim berý máselelerin sheshý joldary» atty baıandama jasaǵan Ulttyq ǵylym akademııasynyń korrespondent-múshesi, professor Kárimbek Qurmanálıev árbir Qazaqstan azamaty óz quqyqtary men mindetterin jaqsy bilý qajettigin, Azamattyq Kodekske jańadan engizilgen baptardy elge habardar etý quqyq salasy qyzmetkerleriniń, ásirese, zańger ǵalymdardyń birinshi kezektegi mindeti ekendigin aıtty.
Ǵylymı otyrysqa Qazaqstan Respýblıkasy Konstıtýsııalyq keńesiniń tóraǵasy, zań ǵylymdarynyń doktory, professor Igor Rogov, akademıkter Sultan Sartaev, Maıdan Súleımenov, Ábdimálik Nysanbaev, О́mirzaq Aıtbaev, Shora Sarybaev jáne basqa da belgili ǵalymdar qatysyp, Strategııada kórsetilgen elimizde qolǵa alynar quqyqtyq saladaǵy reformalar jóninde oı qozǵady.
Qanat ESKENDIR,
«Egemen Qazaqstan».