«Astana Opera» teatry osy maýsym aıynda Túrkistan oblysy men Shymkent qalasyna gastrolmen baryp, tórt kún boıy ońtústik jurtshylyǵyna biregeı qoıylymdar men konserttik baǵdarlamalar usynyp, ǵajaıyp kesh syılady.
Kópshilik álemdik balet juldyzy, Reseıdiń halyq ártisi Altynaı Asylmuratovanyń atalǵan óner ordasyndaǵy klassıkalyq ári zamanaýı horeografııalyq qoıylymdaryn ǵana emes, mazmundy avtorlyq gala-baǵdarlamalaryn da qyzyǵyp kóredi. Osy maýsymnyń ózinde talant ıesi elordalyqtarǵa jıyrmaǵa jýyq gala-kesh usynyp úlgerdi. Sondyqtan ońtústik halqy astanalyq teatrdyń baǵdarlamaǵa engen bir aktili baletterinen bólek, konserttik baǵdarlamanyń úzdik nómirlerin tamashalap, jyly áser aldy.
Bekzat óner ujymy Túrkistan mýzykalyq drama teatrynyń sahnasynda XX ǵasyr jaýhary – N.A.Rımskıı-Korsakovtyń mýzykasyna jazylǵan kemeńger horeograf M.Fokınniń «Sheherazada» baletin tartý etse, Shymkenttegi «Túrkistan» konsert zalynda F.Shopenniń mýzykasyna qoıylǵan M.Fokınniń romantıkalyq balet jaýhary – «Shopenıanany» sahnalap, jurtshylyqty tańǵaldyrdy.
Ásirese daryndy jas Baqtııar Adamjannyń «Sheherazada» baleti men gala-konserttegi ónerine kópshilik dán rıza bolsa, onyń sahnadaǵy juby Anastasııa Zaklınskaıa kásibı sheberligimen óz keıipkerin asha bildi. Al «Shopenıana» qoıylymyndaǵy balet ártisteri somdaǵan beıneler túrli bolmysymen este qaldy. Sondaı-aq D.Shostakovıchtiń mýzykasyna qoıylǵan «Eski fotosýret» shyǵarmasynda Nuraı Nursafına men Aleksandr Kornılovtyń jáne «Baqshasaraı burqaǵy» baletindegi «Tatar bıin» qoıǵan Qýat Káribaev pen balet ártisteriniń óneri de eshkimdi beı-jaı qaldyrmady. «Baıaderka» baletindegi «Úndis bıin» bılegen Jánibek Ahmedıev, Erkejan Júnisova, Bostan Qojabekov jáne t.b. ónerpazdar da kórermenniń ystyq yqylasyna bólendi.
Elimizdegi biregeı óner ordasynyń ártisterine tánti bolǵan kórermender de olarǵa óz rızashylyqtaryn bildirdi. Máselen, Baǵıla Mustafaeva esimdi kórermen osyndaı keremet kesh uıymdastyrǵan «Astana Operaǵa» alǵysyn aıta kelip: «Shynymdy aıtsam, spektaklden alǵan áserimdi sózben jetkize almaımyn. Balet trýppasynyń kórkemdik jetekshisi Altynaı Asylmuratova men ártister tııanaqty daıyndalǵan. «Sheherazada» baleti men gala-baǵdarlamany tamashalap, qazaq baleti joǵary deńgeıde ekenine kózim jetti. О́ner ujymyna shyǵarmashylyq tabys tileımin!» dese, Túrkistan oblysynyń taǵy bir turǵyny Álııa Berdiqulova: «Bizge kelgen teatr ujymyna alǵysymdy aıtamyn. Sizder bizge umytylmas áser, ǵajap kóńil-kúı syıladyńyzdar. Gala-balet baǵdarlamasy tamasha qurylǵan, ártister óte sheber, ásirese «Qıly zaman» nómirin oryndaǵan solıst Sultanbek Ǵumar bıdiń maǵynasyn ár qımylymen asha bildi» dep jyly lebizin jetkizdi.
Qoryta aıtqanda, «Astana Operanyń» jazǵy óner sapary qatardaǵy mádenı is-sharalardyń biri bolyp qoımaı, kórermender úshin mańyzdy oqıǵaǵa aınalǵany, elordalyq teatrdyń balet trýppasynyń kásibı deńgeıiniń joǵary ekenin kórsetti.