Kıeli Ulytaýdyń topyraǵynda, Joshy han tarıhı-memorıaldy kesheninde ótken Ulttyq quryltaıdyń alǵashqy otyrysynan túıgen oı-tujyrym kóp. Quryltaıdan kóptiń kókeıindegi kóp túıtkilge jaýap aldyq.
Osyndaı memlekettik deńgeıdegi asa mańyzdy saıası is-sharanyń Saryarqanyń tórinde – qazaqtyń han-sultandarynyń izi qalǵan saıyn dalanyń tósinde ótkizilýiniń máni tereńde jatyr.
Erte zamannan quryltaı el taǵdyry sheshiletin asa mańyzdy oqıǵalar aldynda shaqyrylǵan. Ulttyq quryltaı Jańa Qazaqstandy qurýǵa tutas eldi jumyldyrý úshin quryldy.
Bul quryltaı – Ádiletti Qazaqstandy qurýǵa qajetti batyl da jasampaz ıdeıalardy usynatyn orta bolsa, Ulytaý – Prezıdent aıtpaqshy, Jańa Qazaqstandy qurý jolyndaǵy birliktiń sımvolyna aınaldy.
Ulttyq quryltaıdyń ózi – qazaqstandyq qoǵamnyń demokratııalyq qaǵıdalarmen ómir súre bastaǵanyn ańǵartady. Prezıdent onyń elektrondy nusqasyn jasaýdy tapsyrdy. Endi Qurultay degen arnaıy mobıldi qosymshasy arqyly kez kelgen adam Ádiletti Qazaqstandy qurý joldary týraly óz usynysyn jetkize alady. Bul – Jańa Qazaqstanda árbir azamattyń oı-pikiri mańyzdy degen sóz.
Osy joly Prezıdent «halyq únine qulaq asatyn memleketke» aınalǵanymyzdy kórsetti. Onyń dáleli – Qasym-Jomart Kemeluly óz sózinde qazirgi kezde qoǵamdyq pikirdi alańdatqan ótkir máselelerdiń barlyǵyna derlik jaýap berdi.
Áýlıetaýdyń eteginde Memlekettik rámizder alańyn ashý týraly usynysy – Kók týymyzdyń qadirin qashyrǵan oqıǵa týraly qoǵamdaǵy sońǵy talqylaýlarǵa jaýap. Al 25 qazandy Respýblıka kúnine ulttyq mereke mártebesin qaıtaryp, Egemendik kúni dep belgileý týraly sheshim – kózi qaraqty azamattar kópten beri aıtyp júrgen másele.
Budan bólek, ulttyq tarıhtyń kóptomdyǵyn ázirleý, zııatkerlik qabileti joǵary, oıy ushqyr, eńbekqor jastar tárbıesin jolǵa qoıý, Til bilimi ınstıtýtyna qazaq tiliniń jańa orfografııasy týraly arnaıy eńbek ázirleýdi tapsyrý – qoǵamdyq suranystan týyndaǵan sheshimder.
Al «Qazaq memleketi aman turǵanda, qazaq tili jasaı beredi. Buǵan eshqandaı kúmán bolmaýy kerek» degen sózi – qoǵamdaǵy eń úlken túıtkilderdiń birine toıtarys berýi.
Shetelge zańsyz shyǵarylǵan qarjyny elge qaıtarýmen aınalysatyn arnaýly mekemearalyq komıssııa qurý týraly sheshim – ádil qoǵamdaǵy barshaǵa teń qaraý qaǵıdasymen úılesedi. Prezıdent «eski Qazaqstannyń» kadrlaryn birtindep aýystyrý týraly da astarlap aıtyp ótti.
Islambek SALJANOV,
Altyn Kyran halyqaralyq qaıyrymdylyq qorynyń prezıdenti