«Jańa Qazaqstan – azamattyq qoǵamy myqty tıimdi memleket». Osyndaı taqyryppen Nur-Sultan qalasynda elordalyq Qazaqstan halqy Assambleıasynyń XX sessııasy ótti. Kezekti sessııada qalalyq QHA tóraǵasynyń orynbasarlary saılanyp, Assambleıanyń birqatar qyzmetkeri marapattaldy.
Sessııaǵa qatysqan memlekettik organdar, etnomádenı birlestikter, Nur-Sultan qalalyq QHA ǵylymı-saraptama toby, Qoǵamdyq kelisim keńesi, Analar keńesiniń jáne Jastar qanatynyń ókilderi memlekettik tildi damytý, patrıottyq tárbıe, memlekettik organdar men buqaralyq aqparat quraldarymen baılanys sekildi máselelerdi talqylady.
«Búginde elordada turatyn qazaqtardyń sany 1 005 147 qurap otyr. Sonymen qatar 140 569 orys, 14 329 ýkraın, 12 788 tatar, 11 558 ózbek, 9 509 nemis, 7 353káris, 5 715 qyrǵyz, 4 4416 ázirbaıjan, 4 047 belorýs, 2 826 ıngýsh, 2 734 polıak, 1 611 uıǵyr, 1 529 sheshen, 1 332 bashqurt, 1 309 armıan, 831 moldavan ultynyń ókilderi turaqty qonystanǵan. Qaı ult bolmasyn qazaq jerin atamekenim dep urpaǵyn ósirip, aýasyn jutyp, tynys-tirshiligin órbitetin bolsa ol mindetti túrde qazaq tilin qurmettep, sóıleý qajet», dep esepteıdi «Turan-Astana» ýnıversıtetiniń kafedra meńgerýshisi, fılologııa ǵylymdarynyń kandıdaty, dosent Vladımır Shnaıder. Sessııada ana tildiń mártebesin sóz etip, qazaq tilinde paıymdy baıandama jasaǵan nemis ultynyń ókili – sonaý 1941 jyly elge qonys aýdarǵan nemisterdiń ekinshi urpaǵy.
«Til keremeti men sóz qudiretin sezinip, túsinýden baryp, adamnyń boıynda otanshyldyq túısik mazdaıtyn bolady. Birneshe tildi erkin bilý – búgingi ómir talaby. Osy qaǵıdany ustana otyryp, bolashaq urpaqty qazaq tilinde sóıleýge, kúndelikti ómirde qazaq tilin qoldanýǵa shaqyrý da sizder men bizderdiń basty mindetimizdiń biri ekenin kún tártibinen shyǵarýǵa bolmaıtynyn aıtqym keledi. Jastarymyzdyń boıyna qazaq tiliniń qyr-syryn, baılyǵy men eń asyldaryn sińirý arqyly biz óskeleń urpaqtyń biregeıligin qalyptastyra alamyz. Osy baǵytta aıanbaı eńbek eteıik, bolashaǵymyzdy jarqyn eteıik!», dep ol jınalǵandardy qazaq tilinde sóıleýge shaqyrdy.
Al Assambleıa hatshylyǵy meńgerýshisiniń orynbasary Indıra Rystına eldegi saıası ózgeristerge baılanysty halyq arasynda júrgizilgen zertteý nátıjelerin sóz etti. «El azamattarynyń 76 paıyzy zańǵa qabyldanǵan túzetýler eldegi jaǵdaıdy jaqsartýǵa kómektesedi dep esepteıdi. Saýalnamaǵa qatysqan qazaqstandyqtardyń 83 paıyzy Prezıdent Q.Toqaevtyń saıası reformalaryn qoldaıdy. Bul derekter Qoldanbaly etnosaıası zertteýler ınstıtýtynyń sosıologııalyq zertteýiniń nátıjelerimen tyǵyz baılanysty. Respondentterdiń 94%-y eldegi saıası jaǵdaıdy turaqty dep baǵalaǵanyn atap ótkim keledi. Qazaqstandaǵy ultaralyq kelisimdi saqtaý jónindegi memlekettik saıasatty qazaqstandyqtardyń 88 paıyzy qoldaıdy. Bul ultaralyq kelisimdi nyǵaıtý men saıası reformalardy jalǵastyrý bir-birimen tyǵyz jáne ózara baılanysty eki prosess ekenin bildiredi. Sondaı-aq Assambleıa konstıtýsııalyq ózgerister men saıası reformalardy júzege asyrýdyń belsendi qatysýshysyna aınalady», dedi ol.
Sonymen qatar Indıra Rystına Assambleıanyń aldynda turǵan mindetterdi de atap ótti.
«Assambleıanyń Memleket basshysynyń tapsyrmalaryn iske asyrý boıynsha belsendi túsindirý jumysy birinshi orynǵa shyǵý kerek. Assambleıanyń ortalyǵy jáne óńirlerdegi barlyq kommýnıkasııalyq alańdary qalyń jurtshylyqty onyń ishinde Assambleıanyń qoǵamdyq qurylymdary, ǵylymı saraptamalyq qoǵamdastyǵy, etnomádenı birlestikterdiń jastary men etnostardy tarta otyryp osy baǵytta jumys isteýi kerek. Respýblıkalyq jáne óńirlik «Dostyq úıleriniń» barlyǵynda Assambleıa músheleri etnomádenı birlestikterdi tarta otyryp saıası reformalardyń júzege asyrylý barysyn túsindirý úshin sarapshylardy daıyndaý jónindegi ádistemelik ortalyqtar uıymdastyrylady», dedi ol.
Is-shara sońynda elorda ákiminiń orynbasary Berik Jákenov Nur-Sultan qalasy Qazaqstan halqy Assambleıasy tóraǵasynyń jańadan saılanǵan eki qoǵamdyq orynbasary – «Jastar» saraıynyń dırektory, QHA múshesi Sergeı Solodovnıkov pen Koreı etnomádenı birlestigi tóraǵasynyń orynbasary Roza Pakty tanystyrdy.