ASTANA. 27 sáýir. Búgin Qazaqstannyń birneshe qalasynda fýtboldan premer-lıga komandalary arasynda kezekti segizinshi týrdyń oıyndary oınaldy. Bul týraly egemen.kz tilshisi habarlaıdy.
Týrdyń barysynda «Aqtóbe» jeńiske jetip, jeke-dara top basyna shyqty. Armenııa quramasynyń burynǵy bas jattyqtyrýshysy Vardan Mınasıannyń qaraýynda alańǵa birinshi rt shyqqan Qostanaıdyń «Tobyly» jeńiske jetti. Qyzylordanyń «Qaısary» Dmıtrıı Ogaıdyń baptaýymen Qaraǵandynyń «Shahterin»súrindirdi.
Astanada qala attas komanda men aqtóbelikterdiń oıynynda meımandar 2:1 esebimen basym tústi. Goldardy qonaqtardan Igor Zenkovıch (4) pen Marat Haırýllın (44) salsa, astanalyqtardan Foksı Ketevoama (15) jaýap qaıtardy. Oıynnyń ekinshi bóliginde alań ıeleriniń jeńisti tartyp alýlaryna múmkindikteri boldy. Biraq Roher Kanıas pen Ketevoama múmkindikterin paıdalana almady.
Shymkentte de osy esep qaıtalandy. Alaıda, onda qonaqtar emes, alań ıeleri basymdyq kórsetti. «Ordabasy» munda Semeıdiń «Spartagyn» qabyldady. Shym qala komandasy sapynan Endrıý Mvesıgva dýbl (44, 73) jasap, komandasynyń jeńisin qamtamasyz etti. Qarsy dopty qonaqtardan Nemanıa Chovıch saldy (65). Sóıtip, semeılikter kezekti jeńilisterine ushyrady. Týrnırde áli jeńiske jetip kórmegen komanda da osy bolyp otyr.
Almatyda Pavlodardyń «Ertisin» qabyldaǵan «Qaırat» ta osyndaı eseppen utysqa jetti. Olardy Ermek Qýantaev (40) pen Aslan Darabaevtyń (43) úsh mınýt ishinde soqqan goldary osyǵan jetkizdi. Al meımandar oıyn aıaqtalýǵa eki mınýt qalǵanda jaýap dop soqty (Predrag Govedarısa, 88).
Qalǵan oıyndardyń bári 1:0 degen eseppen aıaqtaldy:
«Tobyl» (Qostanaı) — «Taraz» (Taraz) 1:0 (0:0). Gol: Anatolıı Bogdanov (5);
«Qaısar» (Qyzylorda) — «Shahter» (Qaraǵandy) 1:0 (1:0). Gol: Ilıa Kalının (60).
«Jetisý» (Taldyqorǵan) — «Atyraý» (Atyraý) 1:0 (1:0). Gol: Vıktor Kovalev (32).
Damır Qojamqul.
Derekkóz: egemen.kz.
Foto: egemen.kz.