QR Premer-Mınıstri Álıhan Smaıylov XII «INNOPROM» halyqaralyq ónerkásiptik kórmesiniń ekspozısııasymen tanysyp, ashylýynda sóz sóıledi, dep habarlaıdy Egemen.kz.
«О́nerkásiptik aýysý: syn-qaterlerden jańa múmkindikterge» taqyrybyndaǵy kórme Ekaterınbýrg qalasynda 4-7 shilde aralyǵynda ótedi.
«INNOPROM» - Reseıde ótkiziletin ındýstrııalandyrý salasyndaǵy eń iri kórmelerdiń biri. Bıylǵy is-sharanyń seriktes eli — Qazaqstan Respýblıkasy. Dástúr boıynsha seriktes eldiń qatysý formatyna aýqymdy ulttyq ekspozısııa, iskerlik jáne mádenı baǵdarlamalar kiredi. Osy oraıda qazaqstandyq ekspozısııanyń aýdany 1600 sharshy metrdi qurady, onda ónerkásiptiń barlyq salalaryn qamtyǵan 200-ge jýyq otandyq kompanııa óz ónimderin usynady.
QR Premer-Mınıstri Álıhan Smaıylov kórme pavılondarynyń ekspozısııasymen tanysty, sondaı-aq RF Úkimetiniń Tóraǵasy Mıhaıl Mıshýstınmen birge kórmeniń ashylý saltanatyna jáne «О́nerkásiptik aýysý: kóshbasshylardyń tájirıbesi» plenarlyq sessııasyna qatysty.
QR Úkimetiniń basshysy óz sózinde Qazaqstannan kelgen delegattar úshin osy alańda kezdesip, ónerkásipti damytý perspektıvalaryn talqylaý, syndarly usynystar men pikir almasý, kóptegen máseleler boıynsha ózara qolaıly sheshimderge qol jetkizý ıgi dástúrge aınalǵanyn atap ótti.
«Elderimiz arasyndaǵy ónerkásiptik kooperasııa salasyndaǵy yntymaqtastyqtyń joǵary qarqynyn erekshe atap ótkim keledi. Buǵan Qazaqstan-Reseı óndiristik kooperasııasy salasyndaǵy Birlesken is-qımyl baǵdarlamasyn iske asyrý aıtarlyqtaı serpin berdi», dedi Álıhan Smaıylov.
Osylaısha, jeńil avtomobılder, elektrovozdar men traktorlar óndirisin qosa alǵanda, $450 mln-ǵa jýyq somaǵa 13 iri joba birlesip iske asyryldy. Jalpy quny $3 mlrd bolatyn taǵy 9 iri birlesken joba iske asyrylý satysynda.
«Búginde Qazaqstan men Reseı kásiporyndary ınnovasııalyq ónerkásiptik jobalardy júzege asyrýǵa tolyq daıyn. Sondyqtan, ónerkásiptiń 7 salasyndaǵy taǵy 22 joba boıynsha yntymaqtastyqty kózdeıtin birlesken is-qımyldyń jańa baǵdarlamasyna qol qoıý mańyzdy ekenin erekshe atap ótkim keledi», dedi QR Premer-Mınıstri.
Álıhan Smaıylov Qazaqstan men Reseı ǵylymı-tehnıkalyq, ınnovasııalyq jáne óndiristik salalardaǵy kooperasııaǵa baǵyttalǵan jańartylǵan tehnologııalyq bazany qurý boıynsha ózara is-qımyl jasaı bastaǵanyn eske saldy.
Úkimet basshysynyń aıtýynsha, bul úshin Qazaqstanda ónerkásiptiń ósýin yntalandyrý boıynsha qajetti quqyqtyq jáne ınstıtýsıonaldyq negiz, onyń ishinde shıkizattyń jetkilikti kólemimen qamtamasyz etý tetigi men uzaq merzimdi sharttardyń quraly bar.
Budan basqa, О́nerkásipti damytý qorynyń maqsattary, mindetteri men fýnksııalary qaıta qaraldy: onyń jumysy jabdyqtar men tehnıkany satyp alýdy lızıngtik qarjylandyrýǵa, sondaı-aq jeńildikti mólsherlememen ónerkásiptik-ınnovasııalyq jobalardy kredıtteýge shoǵyrlandyrylatyn bolady.
«Tutastaı alǵanda, bul sharalar joǵary tehnologııalyq salalardyń ósýine jáne básekege qabiletti ónim shyǵarýǵa yqpal etedi. Sondyqtan tarıhı qalyptasqan ekijaqty baılanystar, qýatty resýrstyq baza jáne bizdiń ekonomıkalyq ıntegrasııamyzdyń artyqshylyqtary tolyq kólemde paıdalanylýy tıis», dep atap ótti Álıhan Smaıylov.
Sóz sońynda ol ónerkásiptik yntymaqtastyqty yntalandyrý Qazaqstan men Reseıdiń ıgiligine jumys istep, ózara tıimdi kooperasııa ekonomıkanyń odan ári ósýine turaqty tirek bolatynyna senim bildirdi.