Tynyshtyq pen beıbitshilik saltanat qurǵan eldiń mereıi ósip, abyroıy asqaqtaı túseri sózsiz. Sebebi ult pen urpaqtyń baıandy ǵumyr keshýine kelisim men tatýlyq basty baspaldaq sanalatyny shyndyq. Nur-Sultan qalasy Qazaqstan halqy Assambleıasynyń uıymdastyrýymen «Eýropa-Azııa Beıbitshilik jáne kelisim marshy» halyqaralyq jobasy aıasyndaǵy mádenıet, beıbitshilik jáne kelisim kúnderi atty mádenı-buqaralyq is-shara ótti. Osyǵan oraı dostyqty dáripteıtin «Eýropa-Azııa Beıbitshilik jáne kelisim marshy» Nur-Sultan qalasynan alǵashqy saparǵa attanbaq.
Keshe elordadaǵy Dostyq úıinde «Eýropa-Azııa Beıbitshilik jáne kelisim marshy» halyqaralyq jobasy aıasynda mádenı-buqaralyq is-shara ótti. Aqparat jáne qoǵamdyq damý, Mádenıet jáne sport mınıstrlikteri, Beıbitshilik jáne kelisim marshynyń atqarýshy komıteti men Nur-Sultan qalasy ákimdiginiń Ishki saıasat basqarmasynyń qoldaýymen uıymdastyrylǵan shara eki kúnge sozylmaq. Birinshi kúni uıymdastyrýshylar baspasóz ókilderine sherýdiń alǵa qoıǵan mindetin túsindirip, artynsha qatysýshylar dóńgelek ústelde marshtyń mańyzdylyǵy týraly oılaryn ortaǵa saldy. Budan keıin birneshe mınıstrliktiń ókilderi, Nur-Sultan qalasy ákimdigi men Amanat partııasy janyndaǵy Jastar qanatynyń Nur-Sultan qalasyndaǵy fılıaly qyzmetkerleri sherýdiń qatysýshylarymen birge arnaıy daıyndalǵan konsertti tamashalady.
«Búkil eldiń halqy bir úıdiń balasyndaı birlikte ómir súrgenin qalaımyn. Ult pen dinge bólinbeı, yntymaqta, uıymshyldyqta ómir súrýge shaqyramyn. Urpaǵymyz beıbit elde tatý-tátti ómir súrý úshin sharaǵa qatysýǵa birden kelistim. О́zimmen birge eki balamdy da alyp keldim», dedi bes balanyń anasy, sherýge qatysýshy Dınara Ákimbekova.
Ol ulttar arasyndaǵy dostyqty dáripteıtin marsh týraly qurbysynan estip bilipti.
Qozǵalystyń Qyrǵyz Respýblıkasyndaǵy jetekshisi Meerım Esenalıeva sherýdiń joǵary deńgeıde ótýi úshin óz elindegi memlekettik uıymdar da jan-jaqty qoldaý kórsetkenin alǵa tartty. Aıtýynsha, adamnyń baqytty ǵumyr keshýi ulttyń tili men dinine, dástúrine qaramaıdy. Eń mańyzdysy, árbir adamnyń júregi «beıbitshilik» dep soqqanda ǵana qoı ústinde boztorǵaı uıalaǵan tynysh zaman ornaıdy. «Eń basty ustanymymyz – halyqty beıbitshilik pen kelisimge shaqyrý. Sizderdi 9 shilde kúni Bishkekte asyǵa kútemiz», dedi Meerım Turarbekqyzy.
Beıbitshilik jáne kelisim marshynyń atqarýshy dırektory Rýslan Abdýllınniń sózinshe, is-sharaǵa qatysýshylar Eýropa men Azııanyń birneshe qalasynda bolady. Atap aıtqanda, Qazaqstannyń – 10, Qyrǵyz Respýblıkasynyń – 1 jáne Reseıdiń 5 qalasyn aralaıdy. Sherýge 46 adam ótinish bildirse, Nur-Sultan qalasyndaǵy alǵashqy is-sharaǵa 28 adam keldi. Qatysýshylardyń sanyna shekteý joq. О́ıtkeni halyqtar arasyndaǵy dostyqtyń jalaýyn jelbiretip, ulttar arasyndaǵy mahabbatty oıatqysy keletin kez kelgen adamnyń sherýge qatysýǵa múmkindigi bar.
«Bizdiń marsh saıasat pen dinı uransyz ótedi. Taǵy bir aıtarymyz, marsh memlekettik bıýdjetke salmaq salmaıdy. О́ıtkeni halyqtyq marsh halyqtyń óz aqshasyna ǵana ótkiziledi. Halyq ózi uıymdastyryp, ózi qarjylaı qoldaý bildirip otyr. Biraq uıymdastyrý isi memlekettiń kómegimen iske asqanyn basa aıtý kerek. Kez kelgen qoǵamdyq istiń júzege asýynda memlekettiń qoldaýy mańyzdy. Marshtyń daıyndyq jumystaryna qolushyn bergen Nur-Sultan qalasy ákimdigine alǵys bildiremin. Sol arqyly elordanyń tórindegi Dostyq úıinde sherýimizdi bastaǵaly otyrmyz», dedi Rýslan Abdýllın.
Aıta ketetin jaıt, Qazaqstannyń bas qalasy «Eýropa-Azııa Beıbitshilik pen kelisim sherýiniń bastapqy núktesi bolady. Baǵyt 17 eldiń aýmaǵyn qamtıdy dep josparlanyp otyr. Alǵashqy baǵyt 4 eldiń aýmaǵynda ótedi. Olar – Qazaqstan, Qyrǵyzstan, Reseı jáne Grýzııa. Kelesi bóligi AQSh aýmaǵyn qamtıdy, úshinshisi Almatyda bastalyp, Djaganapýrada aıaqtalady. Bıyl Beıbitshilik jáne kelisim marshy 16-ret ótedi.