Shildeniń basynan 7-sine deıin Petropavl qalasynda Qyzyljar Music Fest atty dástúrli halyqaralyq án-bı festıvali ótti. Oǵan ózimizdiń ónerpazdarmen qatar Qazaqstannyń kórshi oblystary jáne Reseı Federasııasynyń aımaqtarynan jeke ánshiler men óner ujymdary qatysýda.
Keshki saǵat 19:00-de bastalatyn bul óner dodasy oblys ortalyǵynyń basty alańynda ashyq aspan astynda ótti. Kók jelekti appaq qaıyń men sulý qaraǵaıǵa kómkerilgen sahnaǵa shyǵatyn ónerpazdar qazaq, orys, tatar, bashqurt, ázerbaıjan, armıan halyqtarynyń ánderi men bılerin oryndap, kórermenge rýhanı lázzat syılady. Ánder men bılerdi oryndaıtyndar qatarynda óńirimizge belgili ánshiler men óner ujymdary boldy. Atap aıtqanda Dámesh Qurmankına, Búrkit Jańaı, Iýlııa Stadýhına, Anastasııa Sımonova, Medet Ibadýlla, Laýra Kúrleýitova, Dilnaz Esjan, Murat Bekjanov, Miami, Melomax toptary, «Azııa saýnd» estradalyq ansambli, Bright band toby jáne basqalar. Olardyń oryndaýyndaǵy «Júregim sen ańsaǵan», «Qazaq qyzdary», «Iа lıýblıý», «Sezim syry», «Maýsymjan», «Tansýı so mnoı», «Sen sulý», «Bozjorǵa», «Qaıdasyń», «Mahabbat muńy», «Shirkin-aı», «Belyı flag» jáne t.b. ánder keshki Qyzyljardyń aspanyn ásem áýenge bóledi. Festıval keshteri ár kún saıyn ónerdiń jańa janryn qamtyp otyrdy. Máselen, bir keshte horeografııalyq týyndylar bolyp, bı ujymdary óner kórsetse ertesine estrada juldyzdary sahnaǵa shyqty. Dástúrli ánder keshi de óz aldyna bólek.
Soltústik Qazaqstan oblysy Mádenıet basqarmasynyń uıymdastyrýymen júzege asqan osynaý óner keshteri turǵyndarǵa qýanysh syılap, kóńilderin kók aspanǵa kóterdi.
PETROPAVL