Nur-Sultan qalasynyń ákimdigi vedomstvolyq baǵynysty uıymdarymen birlesip elordanyń jastary men JOO jáne kolledj túlekteri úshin bos jumys oryndar jármeńkesin uıymdastyrdy. JOO túlekterin jumysqa ornalastyrý máselesi áli de ózekti. Barlyq sertıfıkattalǵan mamandar ýnıversıtetti bitirgennen keıin birden jumys taba almaıdy. Sondyqtan jastar jármeńkesi – bul ózderi qalaǵan saladaǵy bos jumys oryndary naryǵyn zertteýge jáne birneshe jumys berýshimen bir jerde tikeleı sóılesýge tamasha múmkindik.
Nur-Sultan qalasynyń Jumyspen qamtý jáne áleýmettik qorǵaý basqarmasy basshysynyń orynbasary Erlan Nurlanuly qala boıynsha jumyssyzdar sany 6 500 adam ekenin, onyń 20 paıyzyn 29 jasqa deıingi jastar quraıtynyn atap ótti.
«Búgingi jármeńke jumys berýshilerge de, jumys izdeýshilerge de óte paıdaly. Sebebi árkim óziniń qalaǵanyn bir alańnan, bir ortadan tabýǵa múmkindik týyp otyr. Biz jyldyń sońyna deıin osyndaı sıpatta áli birneshe jármeńke uıymdastyrýdy kózdep otyrmyz», dedi ol.
Bıyl jumyspen qamtý ortalyǵy 18 jármeńke ótkizgen, jyl sońyna deıin taǵy osynsha ótkizý josparlap otyr.
«Qalamyzda ótip jatqan osyndaı is-sharalar jastardyń turaqty jumysqa ornalasýyna oń yqpalyn tıgizetini anyq. Sebebi jumys izdeýshi jas maman jumys berýshi tarappen tikeleı jáne betpe-bet jolyǵýyna múmkindik bar. О́zi týraly aıtyp, ózi qalaǵan mamandyq týraly tolyqtaı aqparat alýyna da jaǵdaı jasalǵan. Jáne de jármeńkege kelgen jastar jumys berýshi mekemeniń qoıatyn talaptarymen tanysyp, mamandyǵynyń qyr-syryna úńiledi. Bolashaq ómirin baǵdarlaıdy. Sol sııaqty jumys usynýshy kompanııa da jas túlektiń eńbekke degen yntasy men bilimin baıqap, keńirek dıalog qura alady. Meniń oıymsha osyndaı jármeńkeler qalamyzda jıi uıymdastyrylýy kerek», dedi jas túlek Baýyrjan Nurǵalıev.
Jármeńkege arnaıy kelgen jeke kásipker Meıram Ábdirahmanov óziniń jıhaz shyǵaratyn kásipornyna eki qyzmetker izdeıtinin, eger jas mamandardyń jumysqa degen yntasy bolsa, ári qaraı ósip-órkendeýine qoldaý bildiretinin aıtty.
«Búgin Nur-Sultan qalasy ákimdiginiń qoldaýymen uıymdastyrylǵan sharaǵa kelip otyrmyn. Bizdiń jeke kásipkerligimizdiń ataýy – «Tórt aǵaıyndy». Negizgi jumysymyz – jıhaz jasaý. Sondyqtan maǵan eki jumysshy qajet. Birinshisi – dızaıner, ekinshisi – jıhaz qurastyrýshy. Sol eki mamandy tapsam dep kelip turmyn. Negizinen jumysqa jas mamandar kerek. Sebebi qazirgi jastardyń oılaýy, ómirge, qoǵamǵa degen kózqarasy jańasha. Jumysymyzǵa tyń baǵyt bere me degen úmitim bar. Bizdiń taraptan qoıylatyn negizgi talap – jumysqa degen yntasy bolsa, biz qalǵanyn úıretip, onyń kásibı maman bolyp qalyptasýyna kómektesemiz. Kez kelgen adam maman bolyp týmaıdy, ýaqyt óte kele jetiledi jáne óz isiniń sheberine aınalady. «Tórt aǵaıyndy» jeke kásipkerligimiz 2020 jyldyń qazan aıynda qurylǵan. Kishkentaı ǵana orynnan kólemdi kásiporynǵa qadam basyp jatyrmyz. Jańadan jeke kásipker bolyp tirkelip, jumys júrgizip kele jatqan azamattar memleket tarapynan qandaı qoldaý baryn tolyqtaı bilmeıdi, sol sebepti bizde ózimizge beriletin múmkindikterdi bilý maqsatynda osyndaı is-sharaǵa kelip otyrmyz», dedi jeke kásipker Meıram Ábdirahmanov.
Jastarǵa arnalǵan jármeńkemen qatar, kásipkerler úshin Ashyq esik kúni uıymdastyryldy. Shaǵyn jáne orta bıznes ókilderi memlekettik qoldaý boıynsha qabyldanyp jatqan sharalar, onyń ishinde bankterdiń baǵdarlamalary men nesıe ónimderi týraly tolyq málimet alýǵa múmkindik týdy. Maýsym aıynyń ortasynda kásipkerlikti damytý jáne qoldaý aıasynda elordada memlekettik organdar, kvazımemlekettik sektor, «Damý» kásipkerlikti damytý qory» AQ, «Atameken» óńirlik palatasy, ekinshi deńgeıli bank ókilderi men kásipkerlerdiń qatysýymen dóńgelek ústel ótken bolatyn. Kezdesý qorytyndysy boıynsha kásipkerlerdi memlekettik, sondaı-aq jeke nesıe ónimderin qoldaýdyń qoljetimdi sharalary týraly qosymsha habardar etý qajettiligi anyqtaldy. Ashyq esik kúnine qalanyń Investısııalar jáne kásipkerlikti damytý basqarmasynyń, halyqty jumyspen qamtý ortalyǵynyń, «Astana» ÁKK, «AstanaInvest» ınvestısııalardy damytý ortalyǵynyń, «Damý» qorynyń, «Atameken» ulttyq kásipkerler palatasynyń, sondaı-aq ekinshi deńgeıdegi bankter men qarjy uıymdarynyń ókilderi qatysty.
Nur-Sultan qalasy kásipkerler palatasynyń dırektory Beısen Bógenbaıuly atalǵan is-shara kásibin endi bastaǵan azamattarǵa keńinen keńes alýǵa múmkindik beretin taptyrmas alań ekenin jetkizdi.
«Nur-Sultan qalasy kásipkerler palatasy, kásipkerler basqarmasymen birlesip arnaıy Ashyq esik kúnin uıymdastyrýdamyz. Negizgi maqsat – memleket tarapynan qarastyrylǵan qoldaýlardy jeke kásipkerlerge keńinen túsindirý. Olardyń ishinde qarapaıym qaǵıdalardan bastap bıznestiń jol kartasy, qarjylyq uıymdardyń qyzmeti bar. О́zimizdiń kásipkerler palatasynan da birneshe qyzmetker keldi. Olardyń barlyǵy aqysyz qyzmet kórsetedi. Qazirgi tańda jeke kásipkerler jarty jyldyń qorytyndy esebin tapsyryp jatyr. Mysaly, kishi kásipkerlerdiń jeke býhgalterleri bolmaǵasyn, búgin biz olarǵa aqparattyq jaǵynan kómektesemiz. Qosymsha memlekettik qoldaýlar boıynsha ony qalaı alýǵa bolady, qaı salalar jatady degen saýaldarǵa jaýap berý, kásip bastaımyn degen azamattarǵa jol kórsetý maqsatynda osyndaı is-shara uıymdastyrylyp, birneshe sala mamandaryn bir alańǵa jınap otyrmyz. Pandemııa, karantın kezinde shekaralar jabylyp, syrttan keletin jumys kúshi toqtap qalǵan bolatyn. Soǵan baılanysty qurylys salasyndaǵy ókilderimen suhbattasqanymyzda qurylysqa mamandar tappaı jatqanyn aıtqan bolatyn. Nur-Sultan qalasynda 70-ten astam oqý ortalyqtary bar. Ol jerde qysqa merzimdi oqý baǵdarlamasyna negizdelgen ártúrli maman daıyndalady», dedi B.Bógenbaıuly.
Investısııalar jáne kásipkerlikti damytý basqarmasy Kásipkerlikti damytý bóliminiń basshysy Nurjan Áshimov elorda ekonomıkasynda orta jáne shaǵyn bıznestiń úlesi 67 paıyzdy quraıtynyn málimdedi.
«Bizdiń maqsatymyz – bul kórsetkishti odan ári damytý jáne sonyń negizinde jumys isteý. Kásip ashqysy keletin azamattar bizge ártúrli suraqpen júginedi. Onyń ishinde kásip ashý úshin ne isteý kerek, qaıda barý kerek, memleket tarapynan qandaı qoldaý baǵdarlamalary bar, ekinshi deńgeıdegi bankterdiń qandaı nesıeleri bar nemese olardyń paıyzdyq mólsherlemeleri qansha degen sııaqty suraqtar bar. Sondyqtan kásipkerler men turǵyndardyń ýaqytyn únemdeý úshin qarjy uıymdary men qala turǵyndaryn bir alańǵa jınap otyrmyz. Búgin 17 uıym qatysyp otyr. Onyń ishinde 12-si – ekinshi deńgeıdegi bank, 3-eýi – shaǵyn qarjy uıymy, qalǵan 2-eýi – nesıe korporasııasy. Bul jerde tolyqqandy keńes berý, aqparattandyrý jumystary júrgiziledi», dedi N.Áshimov.