«Teńiz» – Atyraý oblysyndaǵy kómirsýtekti shıkizaty mol eń iri kenishtiń biri. Jylyoı aýdanynyń ortalyǵy – Qulsary qalasynan shamamen 150 shaqyrymdaı qashyqta ornalasqan. Ken orny iske qosylǵannan beri halyqaralyq mańyzǵa ıe birneshe joba iske asyryldy. Al qazir keleshek keńeıý jáne uńǵy erneýindegi qysymdy basqarý jobasynyń qurylysy júrip jatyr.
Jaqynda «Teńiz» ken ornyndaǵy jarylys barshany alańdatty. Oblystyq tótenshe jaǵdaılar departamenti qoǵammen baılanys tobynyń málimetine súıensek, ken ornyndaǵy 3-býyn zaýytynyń 42-ýchaskesinde gıdrotest júrgizilgen. Jergilikti ýaqytpen saǵat 9:55-te qubyrdyń flanesti qosyndysy úzilgen. Sonyń saldarynan eki adamnyń ólimine soqtyrǵan jarylys bolǵan.
Atalǵan jobany iske asyratyn merdiger kompanııa – «Senimdi Qurylys» JShS-de jumys isteıtin 1985 jylǵy er adam oqıǵa ornynda qaza tapty. Keıin «Teńizshevroıl» JShS-ne qarasty medısınalyq klınıkada «Agroprom tehnıka» JShS-niń bir jumysshysy qaıtys boldy. Jarylystan jantásilim etken eki jumysshy 37 jasta eken.
Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, jaraqat alǵandardyń biri – 1996 jylǵy jigit eki saǵattyń ishinde oblystyq aýrýhanaǵa jetkizildi. Onyń ishki aǵzasy zaqymdanǵan. Dárigerler naýqastyń baýyry men búıregine tigý arqyly qalpyna keltirý otasyn júrgizdi. Sondaı-aq naýqastyń ót joly úzilgeni belgili boldy. Omyrtqasy men birneshe qabyrǵasy synǵan. Qazir naýqastyń jaǵdaıy aýyr. Dárigerler naýqastyń jaǵdaıyn únemi baqylaýda ustap otyr, deıdi A.Baıdýalıev.
Onyń aıtýyna qaraǵanda, jaraqat alǵannyń ekinshisi – 1998 jylǵy jumysshy. Oǵan alǵashqy psıhologııalyq kómek kórsetilgen. Keıin zardap shekken jumysshy esin jıyp, óz-ózine kele bastaǵan. Al úshinshi jumysshy Jylyoı aýdandyq ortalyq aýrýhanasyna jetkizilgen. Ol óziniń qolhatynyń negizinde úıine jiberilgen. «Zardap shekken jumysshy kompıýterlik tomografııaǵa, rentgenge túsirildi. Onyń azdaǵan jaraqaty bolǵan. Qazir jaǵdaıy qanaǵattanarlyq dep baǵalanyp otyr», dep málim etti A.Baıdýálıev.
«Senimdi qurylys» JShS-nyń óndiristik qatynastar jónindegi menedjeri Gúlmıra Bapanovanyń málimetinshe, jarylystan keıin óndiristik nysandaǵy jumys ishinara toqtatylǵan. Qaıǵyly oqıǵa vahtalyq aýysymnyń aıaqtalýyna eki kún qalǵanda bolǵan.
– Jarylys bolǵannan keıin 4 myńǵa jýyq jumysshy demalysqa jiberildi. Jumysshylarǵa zańdylyqqa sáıkes jalaqy tólenedi. О́ndiris alańyndaǵy jarylystyń sebebin anyqtaý úshin «Teńizshevroıl» JShS men oblystyq memlekettik eńbek ınspeksııasy basqarmasynyń qyzmetkerleri kirgen birlesken komıssııa quryldy. Tekserý komıssııasyna qajetti qujattardyń bárin berdik. Sondyqtan jarylystyń sebebi tekserýden soń anyqtalady, – deıdi G.Bapanova.
Menedjerdiń túsindirýinshe, jarylystan kóz jumǵan eki jumysshynyń otbasyna materıaldyq qoldaý kórsetilgeli otyr. Kompanııa marqumdardy sońǵy saparǵa shyǵaryp salýǵa jumsalatyn barlyq materıaldyq shyǵyndy óz moınyna alyp, iri qara satyp alýǵa 500 myń teńgeden qarjy bergen.
– Bizdiń kompanııanyń basshylyǵy marqumdardyń barlyq qaryzy men nesıesin jaýyp berý, balalarynyń oqý aqysyn tóleý týraly sheshim qabyldady. Aldaǵy ýaqytta bul otbasylarǵa udaıy kómektesýdi mindetimizge alamyz, – dep málim etti kompanııa menedjeri.
Atyraý oblysy