Bul oqıǵa 2016 jyly bolǵan. Sol kúni tártip saqtaýdy qadaǵalap júrgen Rýslan Akmatovtyń patrýldik ekıpajyna Esildiń ústindegi kópirge shyǵyp, bıikten sekiremin dep turǵan qyzdy qutqarý týraly tapsyrma túsedi.
«Qyz kópirdiń jaqtaýynan ǵana ustap turdy. Oǵan jaqyndaý múmkin emes edi. Ashýy shegine jetken qyz sál qatelik jibersek, kópirden qulaýǵa daıyn bolatyn», dep eske alady Rýslan Akmatov. Sondyqtan Rýslan qyzǵa jyly sóılep, baılanys jasaýǵa táýekel etedi. Basynda eshbir sózge ılikpegen qyz birte-birte tilge keledi. Aldymen jigitten temeki suraıdy. Qýanyp ketken jigit óziniń sportshy ekenin, sondyqtan temeki shekpeıtinin aıtyp, qazir áriptesimnen alyp bereıin deıdi. «Temekini alyp, bıiktegi jaqtaýmen jaqyndaı bergenimde qyz shoshynyp, «jaqyndamańyz, sekiremin» dep baj etti. Men temeki bergeli kele jatyrmyn, alystan bere almaımyn ǵoı dep jaqyndaı tústim. Qyz qolyn sozyp temekini ala bergende bileginen shap berip ustaı aldym. Degenmen sekirip ketse meni de tartyp áketýshi edi, sondyqtan ony jaqtaýdyń basqyshynan bultartpaı súırelep otyryp, alyp shyqtym», dep eske alady Rýslan.
О́z ómirin qaterge tigip adamdy ajaldan alyp qalǵany úshin ol memlekettik nagradaǵa sol jyly usynylǵan bolatyn. Biraq marapat belgisiz sebeptermen berilmedi. Tek Tótenshe jaǵdaılar qyzmetiniń vedomstvolyq III dárejeli «Qutqarýshy» tósbelgisin ǵana alǵan edi. Biraq «aqqa Qudaı jaq» degendeı ony nagradtaý týraly usynys qaıta qaralyp, jýyrda Ishki ister mınıstri, general-leıtenant Marat Ahmetjanov Prezıdenttiń Jarlyǵymen berilgen «Erligi úshin» medalin batyrdyń keýdesine taqty. Sóıtip, keshikken nagrada ıesin tapty.
Qazir Rýslan Akmatov sol patrýldik polısııa qyzmetinde isteıdi, sheni aǵa leıtenant. Ol keshikken marapatqa óziniń eshqashan alańdamaǵanyn aıtady. О́ziniń kásibı mindetine adal, moınyna júktelgen tapsyrmalardy yjdahatpen oryndap, árqashan alda bolýǵa tyrysady. Al patrýldik polısııa qyzmetinde ártúrli jaǵdaılar, oqys oqıǵalar jıi kezdesedi. Bosanatyn áıeldi perınataldyq ortalyqqa kedergisiz jetkizý, buzylǵan kólikti súırep aparýǵa kómektesý, qart adamdy joldyń arǵy betine ótkizý, joǵalǵandardy izdeýge qatysý – mine, osylar R.Akmatov jumysynyń bir parasy ǵana. «Polısııa qyzmetkeri úshin eń bastysy, meniń oıymsha, adal, ádepti bolý, qyzmettik mindetterdi abyroımen atqarý jáne jaı ǵana adam bolyp qalý», deıdi keıipker. Rýslan sportpen de belsendi aınalysady. Áriptesterimen birge shyǵys jekpe-jeginiń qyr-syrlaryn úırenedi.
Aıta ketetin jaıt, qazir Soltústik Qazaqstan oblysynyń Polısııa departamentinde «Erligi úshin» medalimen marapattalǵan Rýslannan basqa 8 polısııa qyzmetkeri qyzmet etedi.
Soltústik Qazaqstan oblysy