Bul týraly elorda ákimi Altaı Kólginov málim etti, dep habarlaıdy Egemen.kz.
«Qyzmetkerlerdiń eńbek jaǵdaıyn júıeli túrde jaqsartýdy ary qaraı jalǵastyramyz. 1 maýsymnan bastap áleýmettik, mádenıet (kitaphanalar, murajaılar), sport, jergilikti polısııa qyzmeti jáne basqa mamandarynyń jalaqysy kóterildi. Osylaısha elorda mekemelerinde jumys isteıtin 4 myńǵa jýyq maman qamtyldy. Máselen áleýmettik mekemeler, medısınalyq-ońaltý ortalyqtary, kitaphana jáne basqa oryndarda jumys isteıtin, jalaqysy tómen qyzmetkerlerdiń eńbekaqysy 30%-dan 50%-ǵa deıin kóbeıdi», dep jazdy qala ákimi Instagram paraqshasynda.
Osyǵan baılanysty ol birneshe mysal keltirip ótti.
«Mysaly «Januıa» otbasy ınstıtýtyn qoldaý ortalyǵy jáne «Belsendi uzaq ómir súrý ortalyǵy» áleýmettik qyzmetkerlerdiń jalaqysy 1,5 ese ósken. Al kitaphanashylardyń jalaqysy 30%-dan asa («Ortalyq kitaphana júıesi» KMM), sýretshilerdiń jalaqysy 50%-ǵa ósti. Jergilikti polısııa qyzmetiniń jalaqysy 30%-ǵa deıin kóterildi, azamattyq qyzmetkerler (S, D sanattary jáne razrıadtaýshylar) 1,8 ese ósti. «Memleket basshysynyń tapsyrmasy boıynsha osyǵan deıin medısına qyzmetkerleriniń, pedagogterdiń, kommýnaldyq kásiporyn qyzmetkerleriniń jalaqysy kóterilgen bolatyn. Osy baǵyttaǵy jumysty ary qaraı da jalǵastyramyz», dedi Altaı Kólginov.