Nur-Sultanda «Omıkron» shtamyna baılanysty epıdemıologııalyq ahýal nasharlady. Jaǵdaı kúnnen kúnge ýshyǵyp barady. Bul týraly elordanyń bas memlekettik sanıtarlyq dárigeri Sarhat Beısenova onlaın brıfıngte málimdedi, dep habarlaıdy Egemen.kz qalalyq ákimdiktiń resmı saıtyna silteme jasap.
«Elordada Sars-Cov-2 vırýsynyń «Omıkron» shtamy aınalymynyń jalǵasýyna baılanysty epıdemıologııalyq jaǵdaı nasharlap, qıyndaı tústi. 22 maýsymnan 5 shildege deıin (2 aptada) 414 jaǵdaı tirkelgen bolsa, sońǵy 2 aptanyń ishinde (6 shildeden 19 shildege deıin) 3970 KVI jaǵdaıy tirkeldi, osylaısha aýrý deńgeıi 9,5 esege artty», dedi sanıtarlyq dáriger.Sońǵy táýlikte 586 adamnan KVI anyqtaldy. Epıdemıologııalyq jaǵdaıdy baǵalaýdyń jańartylǵan matrısasy boıynsha qala «sary» aımaqqa jaqyndap keledi.Maýsym aıynda elordada KVI-diń 30 oń synamasyna molekýlıarlyq-genetıkalyq zertteý júrgizildi, bul stels-omıkron shtamymen aýyrý jaǵdaılarynyń basym bolǵanyn kórsetti.«Kishi túrleri bar «Omıkron» shtamy óte juqpaly bolyp keledi, barlyq jastaǵy adamǵa tez juǵady. Alaıda, 20-dan 30 jasqa deıingi adamdar arasynda kóbirek juǵady. Ol sondaı-aq «Delta» nusqasyna qaraǵanda juqpaly. Klınıkalyq belgileri – sharshaý, bas aýrýy jáne dene temperatýrasynyń joǵarylaýy. О́kinishke oraı, ekpe alǵandarda, sondaı-aq KVI-men aýyrǵandar sııaqty ýaqyt óte kele aǵzanyń ınfeksııadan qorǵalý deńgeıi tómendeıdi, sonyń saldarynan adam qaıtadan ınfeksııaǵa beıim bolady», dep atap ótti Sarhat Beısenova.Osyǵan baılanysty ol elorda turǵyndaryna vaksınasııanyń alǵashqy kýrsyn alǵannan keıin 6 aıdan soń KVI-ge qarsy revaksınasııadan ótýdi usyndy. Sondyqtan dárigerler elorda turǵyndaryn vaksınasııadan ótýge, al ýaqyty kelgenderdi revaksınasııadan ótýge shaqyrady.