Abaı oblysynyń ákimi Eýropa qaıta qurý jáne damý bankiniń ókilimen kezdesip, óńirdegi birlesken jobalardyń júzege asyrý barysyn talqylady. Máselen, qarjy ınstıtýty Semeıdegi sýmen qamtamasyz etý júıeleri men kóshe shamdaryn jańartýǵa, sondaı-aq Aıagózdegi káriz-tazartý júıelerin jańǵyrtýǵa septesip keledi.
Sonymen birge Eýropa qaıta qurý jáne damý banki oblystyń medısınasy men ekologııasy salasynda da birlesip jumys isteýge nıetti. Qazir oblys ortalyǵyndaǵy sýmen jabdyqtaý jobasy aıaqtalýǵa jaqyn. Al jaryqtandyrý máselesine kelsek, Semeıdiń kóshelerine áli 7 myńǵa jýyq jaryq núktesi jetispeıdi. EQDB baǵalaýyna sáıkes bul úshin shamamen 2,4 mlrd teńge qajet. Onyń 500 mln teńgege jýyq somasyn oblys ákimdigi bólse, qalǵan bóligin eýropalyq bank nesıeleýge daıyn. О́ńir basshysy Nurlan Uranhaev kóshelerdiń jaryqtandyrylýy ortalyqta ǵana emes, búkil qala boıynsha laıyqty deńgeıde qamtylyp, qarańǵy ýchaskelerde jaryq barynsha joǵary bolýǵa tıis ekenin aıtty.
Semeıde EQDB-nyń qoldaýymen júzege asyrylyp jatqan ekinshi joba – qatty turmystyq qaldyqtar polıgonynyń qurylysy. Soǵan sáıkes byltyr kredıttik kelisimge qol qoıylǵan edi.
«Polıgondy jańa jerde ornalastyrý kózdelip otyr. О́ıtkeni eski polıgon Ekologııalyq kodeks normalaryna saı kelmeıdi, sondaı-aq qatty-turmystyq qaldyqtardyń bıologııalyq óńdeýin kózdeıtin jelini salý qarastyrylǵan. Jalpy alǵanda, bul keshen aldaǵy 30-40 jylda polıgondy odan ári keńeıtip, QTQ-ny tereń óńdeıtin tehnologııalar arqyly qalanyń barlyq turmystyq qaldyǵyn kádege jaratýǵa múmkindik beredi», dedi Eýropa qaıta qurý jáne damý banki dırektorynyń Qazaqstan boıynsha orynbasary Baqtııar Faızeev.
Áıtse de oblys ákimdigi qazirgi polıgonnyń da paıdasyz qalmaýyna múddeli. Bul úshin rekýltıvasııany júrgizý qajet dep sanaıdy jaýapty vedomstvodaǵylar.
Úshinshi baǵyt – káriz-tazartý júıeleriniń qurylysyna baılanysty. Qazir Qazaqstanda 27 káriz-tazartý júıesin jańǵyrtýǵa qatysty baǵdarlama qabyldanyp, Aıagózdegi quny 6 mln eýro bolatyn joba eń negizgileriniń biri sanalady. Ol tarıfterdi sýbsıdııalaý qaǵıdalaryna sáıkes respýblıkalyq bıýdjet qarajaty esebinen qarjylandyrylady.
«Birlesip jumys isteýge múmkindik beretin basqa da jobalardy qarastyrýǵa bolady. Mysaly, Ertis pen Alakóldiń jaǵalaýyn nyǵaıtýǵa, Shúlbi GES-tiń kontr-retteýishiniń qurylysyna jáne Semeı qalasyndaǵy Ertis ózeniniń sol jaǵalaýynda jańa jedel medısınalyq járdem stansasyn salýǵa baılanysty. Yntymaqtastyqty naqty paıda ákeletin jobalar boıynsha talqylaýǵa daıynbyz», dedi oblys ákimi.
Semeı EQDB-nyń «Jasyl qala» baǵdarlamasyna qatysyp kele jatqan elimizdegi tórt qalanyń biri sanalady.
SEMEI