«Qazaq analary – dástúrge jol» jobasynyń aıasynda Analar qaýymdastyǵynyń Aqtóbe fılıaly men Saǵı Jıenbaev atyndaǵy oblystyq jasóspirimder kitaphanasy birlese otyryp, keń kólemdi etnofestıval ótkizdi.
Ashyq aspan astynda, sý jaǵasyndaǵy jasyl alańqaıda kıiz úı tigilip, et asyldy. Festıvaldyń ereksheligi de sonda, jobanyń tóraıymy Názıra Tabyldınova bastaǵan aq jaýlyqty analar, apalar, qyzdar jas erekshelikterine saı taqııa, bórik, oramal, kımeshek pen qazaqy naqyshtaǵy qajekeı, qamzol, búrmeli kóılekterin kıip, qazaqtyń ulttyq zergerlik áshekeılerin taǵyp keldi.
Jalpy, qazaq halqynyń salt-dástúrleri: bala tárbıesine arnalǵan salt-dástúrler, turmystyq salt-dástúrler, áleýmettik-mádenı salt-dástúrler bolyp úlken úsh topqa bólinetini belgili. Etnofestıval barysynda uıymdastyrýshylar joǵaryda atalǵan úsh baǵyttaǵy salt-dástúrlerimizdiń jón-joralǵysyn túgel qamtýǵa tyrysty jáne olar tanymdyq-taǵylymdyq turǵydan alǵanda is-sharaǵa jınalǵan jurtshylyqtyń kóńilinen shyqty deýimiz kerek.
Etnofestıval sońynda kitaphana dırektory, aqyn, «Qazaq analary – dástúrge jol» jobasynyń belsendi múshesi Gúljaınar Nárenqyzy ulttyq aspap – dombyranyń súıemeldeýimen jınalǵandarǵa án-jyrdan shashý shashty. Máre-sáre bolǵan kópshilik túrli ulttyq taǵamdardan dám tatyp, qýanyshty tarqasty.
Ulttyq salt-dástúrlerimiz ǵasyrlar boıy qalyptasqan qundylyqtarymyz bolǵandyqtan, olardy qolymyzdan kelgenshe dáriptep, jas urpaqtyń boıyna sińire berýimiz kerek. Al ultymyz úshin ıgiligi men taǵylymy mol osyndaı etnofestıvaldar óz Otanynyń tarıhyn, salt-dástúri men ádet-ǵurpyn, rýhanı qundylyqtaryn boıyna sińirgen, úlkenge izeti, kishige qurmeti bar, ıaǵnı ulttyq kodty saqtaı alatyn tulǵa qalyptastyrýǵa sebepshi bolady degen senimdemiz.
Aınur TО́LEGENOVA,
Saǵı Jıenbaev atyndaǵy oblystyq jasóspirimder kitaphanasynyń bıblıografy
AQTО́BE