Tirshilik kózin tiginshilikten tapqan

Álfııa Júkenova belgili telejúr­gizýshi, jurtshylyqty shaǵyn kásipke baýlyp júrgen Dınara Sátjannyń kýrsynan tálim alyp, 2019 jyldan bastap tigin isin ıgerýge kirisedi.

Alǵashynda bir tigin mashınasymen iske kirisken onyń qazir túrli opera­sııa jasaı alatyn 15 is mashınasy bar. Bárin de úsh jyldyń ishinde óz aqshasyna satyp alǵan. Aldymen 30 sharshy metrde jalǵyz «JAK» tigin mashınasymen bir ózi tiginmen aınalysypty. Qoly júretinine kózi jetken soń óndirisin ulǵaıtyp 80 sharshy metrlik ǵımaratty jalǵa alady. Alǵashynda úsh adam birigip istese, qazir onyń qaramaǵynda 9 qyzmetker bar. Aldymen shaǵyn bylǵary sómkeler, odan sporttyq kostıýmder, kóılekter, tipti avtomobılderge arnalǵan sómkeler de tigedi. Ámııan sekildi bylǵary sómkelerdi tigý ádisin Á.Júkenova Sankt-Peter­býrgtegi kýrstan úırengen. Bir óki­nishtisi sol, osy ónimdi jalǵastyrý isi qazir toqtap qalǵan, óıtkeni Reseıden bylǵary alý qıyndap ketipti.

Álfııa 10 tamyzda Aqtaý qalasynda bolatyn sán dızaınerleriniń kórmesine qatysqaly otyr. Oǵan ulttyq órnekter salynǵan  kostıým, shapan, kóılek tigip aparmaqshy.  

Álfııanyń óndirisiniń bir artyq­shylyǵy retinde onyń áleýmettik bıznespen aınalysatynyn ataýǵa bolady. Onyń qaramaǵynda áleýmettik osal toptardyń ókilderi de jumys isteıdi. Eki áıel Irannan oralǵan jalǵyzilikti kópbalaly áıel, taǵy bir qyz ekinshi toptyń múgedegi, qolynan is keletin zeınetker áıelder de munda nápaqasyn aıyryp júr. 

Bıyl Á.Júkenova jalǵa alǵan ǵımaratynda is tigý jáne pishý boıynsha ortalyq ashamyn dep jarııalaǵan. Oǵan 10-15 oqýshy qabyldanypty. Ashylý saltanatyna oblys ákiminiń orynbasary Ǵanı Saqtaǵanov pen belgili bıznesvýmen, Álfııanyń ustazy Dınara Sátjan da qatysty. Qazir munda tiginshilik pen pishýdiń qyr-syryn bilgisi keletin qoldary bos adamdar túske deıin kelip, aqyly túrde sabaq alady. Al jumysqa ornalastyrý ortalyǵy arqyly tiginshilikke úırengisi keletin adamdardy qabyldaı almaıdy. «О́ıtkeni bizdiń atalǵan memlekettik organmen ázirge kelisim-shartymyz joq. Eger olar ózderi jibe­retin adamdar úshin aqy tóleıtini týraly kelisim jasasa, árıne, biz ondaı adamdardy da tiginshilikke úıretemiz», deıdi kásipker.  

Qazirgi jalǵa alǵan úlken ǵıma­rat­tyń biraz bóligine áli jylý tartylyp úlgermegen, jańa qurylys. «Eger osy jerge bıyl jylý engizilse, óndi­ris­ti ulǵaıtyp, 45 adamǵa deıin jumys or­nyn asha alamyz», dep otyr Álfııanyń ózi.   

Árıne, biz onyń memlekettik tap­syrys boıynsha tenderlerge qatysý múmkindigin suradyq. Biraq bul ja­ńadan bastaǵan kásipker­ler úshin ońaı emes eken. Aldymen «Atameken» kásipkerler palatasy­nyń batasyn alyp, sosyn Indýstrııa jáne ınfra­qurylymdyq damý mınıstr­liginen arnaıy «ındýstrıaldyq sertıfıkat» degen qujat ıelený kerek eken. Tek osy qujatyń bolsa ǵana ten­derge qatysa alasyń. «Onyń talabyn tolyq oryndaý óte qıyn. Sondyq­tan ondaıdy men túgil birneshe jyl­dan beri úlken kásipkerlikpen aınalysyp júrgender de ala almaı júr. Sol sebepti biz ondaı qujat alýǵa ázirge talpynǵanymyz joq», deıdi Á.Jú­ke­nova. Kásipkerdiń aıtýyna qara­ǵanda, qazir «Atameken» palatasy jeńil ónerkásip ónimderin shyǵaratyn usaq kásipkerlerdiń basyn biriktirip assosıasııa qurmaq kórinedi. Mine, osy assosıasııa bolashaqta tenderlerge qatysyp, quramyndaǵy kásipkerlerge memlekettik tapsyrystar alyp berýge tyrysatyn bolmaq... 

Álfııanyń aıtýyna qaraǵanda, qazir kásipker astanadan 50 sporttyq kostıým tigýge tapsyrys alǵan. Onyń ústine 20 kostıýmdi qosymsha tikpek jáne olardy tez arada ázirleýge tıis. Tapsyrys berýshiler bulardy ınternetten, túrli BAQ-tardaǵy jarnama, habarlandyrýlardan ózderi izdep tabady eken.

Árıne, shaǵyn bıznesti dóńgeletip ketý ońaı emes. Ol úshin qajyrlylyq pen belsendilikten basqa sheber kadrlar tabý da kerek. Tiginshilik úlken óner, neshe jerden mashına jetildirilgen bolsa da, qoldyń ebi bolmasa ony tıimdi paıdalaný qıyn. Al pishý jumysy – tiginshiliktegi barlyq operasııanyń ishindegi kúrdelisi. Álfııa bul iske uzaq jyldar boıy Petropavldaǵy burynǵy «Komsomolka» tigin fabrıkasynda sheber tiginshi bolyp  istep, birneshe orden-medal alǵan, artynan birneshe jyl mektepterge tiginshilik boıynsha sabaq bergen, zeınet demalysyndaǵy Raıhan Suraǵanovany tartypty. «Apaıymyzdyń óneri de, isi de bizge úlken úlgi bolyp otyr. Biz ol kisini qatty qurmetteımiz», deıdi Á.Júkenova.

Qazir soltústiktegi shaǵyn kásip­kerlerdiń 42 paıyzy – áıelder, sonyń biri – osy Álfııa Júkenova. «Jeke kásipker» dep qana tirkelgen onyń kásipornynyń damı túsetinine sengiń keledi, óıtkeni ol eshkimge senbeı, eshkimge qol jaımaı óz jolyn taýyp, senimdi qadammen alǵa júrip keledi.

PETROPAVL