«Zamanyń túlki bolsa, tazy bop shal» degendeı, qazir polıseıler de ınternet-alaıaqtardy quryqtaý joldaryn jetildirip keledi. Shildeniń 26-27-si kúnderinde Anti-fraud jedel-profılaktıkalyq is-sharasy rejiminde jumys istegen soltústikqazaqstandyq krımınaldyq polıseıler alty ınternet qylmysty anyqtady.
Sonymen birge pın kodyn bilip alyp jasaǵan 14 qylmys ashyldy. Onyń ishinde bireýi bank kartochkasy arqyly aqshasyn bankomattan urlap alý bolsa, qalǵany ıelerine nesıe resimdeý jolymen jasalǵan qylmystar.
Olx.kz, Krisha.kz, Kolesa.kz saıttaryna jáne VKontakte, Instagram áleýmettik jelilerine monıtorıng jasaý barysynda birneshe qylmystyń joly kesildi. Máselen, bir avtomobıldi satý týraly úsh qaladan feık habarlandyrýlar berilgen. Alýshy tabylsa, aldyn ala tólegen aqshasynan aıyrylyp qalar edi. Osyndaılardan zardap shekkender bolsa, olardy anyqtaý jumystary júrgizilip jatyr.
«Budan bólek, Instagram-da sporttyq kıim satatyn jalǵan dúkenniń akkaýnty anyqtaldy», dep tolyqtyra ketti oblystyq PD Krımınaldyq polısııa basqarmasynyń bastyǵy, polısııa podpolkovnıgi Marat Jumalıev. – Alaıaqtar Petropavldaǵy mekenjaıdy kórsetken, al shyndyǵynda onda eshqandaı saýda orny bolmaı shyqty. Zardap shegýi múmkin adamdardy anyqtaý boıynsha sharalar qabyldandy. Barlyǵy is-sharanyń úsh kúninde túrli quqyqqa qaıshy kontenti bar 60 silteme anyqtalyp, Aqparat jáne qoǵamdyq damý mınıstrligine tekserý jáne buǵattaý úshin jiberildi».
PETROPAVL