Qazaqstannyń avıasııalyq ákimshiligi jasandy ushý-qoný jolaǵyn qaıta jańartý júrgizilgennen keıin Úsharal áýejaıyna sertıfıkattyq tekserý júrgizdi, dep habarlaıdy Egemen.kz.
«Búgingi kúni negizgi jumys túrleri, onyń ishinde ushý-qoný jolaǵyn 2700 metrge deıin uzartý jáne rýldeý jolyn keńeıtý aıaqtaldy, Jetisý oblysynyń ákimdigi merdigerlik uıymmen birlesip joba boıynsha qalǵan jumystardy iske asyrý boıynsha sharalar qabyldaýda», delingen Azamattyq avıasııa komıteti habarlamasynda.
Vedomstvonyń málimetinshe, júrgizilgen tekserý nátıjeleri boıynsha Úsharal áýejaıyna paıdalanýǵa jaramdylyq sertıfıkaty berildi.
Búgin áýe kompanııalary Úsharal – Almaty jáne Úsharal – Nur-Sultan sýbsıdııalanatyn baǵyttary boıynsha avıabıletterdiń satylymyn ashady.
Reısterdi SCAT avıakompanııasy crj2 (50 oryndyq) áýe kemelerinde ár baǵyt boıynsha aptasyna 14 reıs jıiligimen jazǵy maýsymda, qalǵan ýaqytta 7 reıs oryndaıdy. Bılet quny tıisinshe 15 000 teńge jáne 16 000 teńge bolady. Ushýlar 2022 jyldyń 15 tamyzynan bastalady.
Sondaı-aq Úsharal-Taldyqorǵan baǵyty boıynsha «Jetisý» avıakompanııasy 11 tamyzdan bastap jazǵy maýsymda 28 reıs jıiligimen, qalǵan kezeńde 14 reıs oryndaıdy. Ushýlar L-410 (19 oryndyq) ushaǵynda oryndalady. Bılet baǵasy - 8 000 teńge.