Uly Jeńis merekesi qarsańynda Ulttyq kásipkerler palatasy qolǵa alǵan «О́mir joly» jobasynyń arqasynda 150 ardagerge shuǵyl jaǵdaıda kómek shaqyrýǵa arnalǵan qurylǵylar tartý etildi.
Ulttyq kásipkerler palatasy qurylǵyny tanystyrý maqsatynda arnaıy baspasóz máslıhatyn uıymdastyrdy. Oǵan basqarma tóraǵasynyń orynbasary Nurjan Áltaev, «Ardagerler uıymy» Respýblıkalyq qoǵamdyq birlestigi ortalyq keńesiniń tóraǵasy О́mirzaq Ozǵanbaev, «О́mir joly» jobasynyń ókili Ilııas Omarov qatysty.
Ulttyq kásipkerler palatasy basqarma tóraǵasynyń orynbasary N.Áltaevtyń aıtýynsha, palata bıyl bul qurylǵyny Astanada 100 jáne Almaty qalasynda turatyn 50 ardagerge tegin ornatty. Sondaı-aq, bir jylǵy qyzmet aqysyn ótedi. Bıznes-qaýymdastyq Uly Jeńistiń 70 jyldyǵyna oraı elimizdegi soǵys ardagerlerin atalǵan qurylǵymen túgel qamtýdy kózdep otyr. Sonymen qatar, bul jobany halyqty áleýmettik qorǵaý jónindegi óńirlik baǵdarlamalary arqyly qarjylandyrý usynylýda. Atap aıtsaq, AQSh, Eýropa elderinde «SOS» tetigin qoldanatyn azamattardyń 55 paıyzyna qurylǵy memleket qarjysy esebinen ornatylady eken.
«О́mir joly» áleýmettik-kommersııalyq jobasy soǵys ardagerleri, egde azamattar men múmkindigi shekteýli, kómekke asa zárý jandardy qoldaý maqsatynda qurylǵan bolatyn. Al osy joba negizinde qolǵa alynyp otyrǵan qondyrǵylar adamdarǵa jedel kómek shaqyrtýǵa óte qolaıly qural bolyp otyr. Arnaıy tetikti basý arqyly azamattar táýlik boıy jumys isteıtin biryńǵaı kómek ortalyǵynyń qyzmetine júgine alady. Álemniń damyǵan elderinde mundaı qyzmet 30 jyldan beri kómekke zárý azamattarǵa tıimdi jumys istep tur. О́tken jyly «О́mir joly» «Atameken Start-up» baıqaýynda úzdik joba atanǵan bolatyn.
Dınara BITIKOVA,
«Egemen Qazaqstan».