ASTANA. 9 mamyr. Atyraýlyq áıel ulynyń máıiti joǵalyp ketkenin habarlap, dabyl qaqty. Bul týraly KTK telearnasy habarlady.
«Atyraýda turatyn áıel óz ulynyń denesi joq bolyp ketkenin aıtyp shaǵyndy. Marqumnyń týystary ol jerlengennen keıin úshinshi kúni beıitke kelip, birden tilden aırylyp qala jazdady. Sebebi, adam kómilgen qabirdiń ishi bosap qalypty», - delingen habarlamada.
Sóıtse, bul oqıǵaǵa polıseılerdiń qatystary bar bolyp shyqty. Olar er kisiniń ólimine neniń qatysy bolǵanyn zerttep bilý úshin onyń denesine eksgýmasııa jasap kóripti. Alaıda, áıel beıitti ashý týraly eshkimniń ózinen ruqsat almaǵanyn aıtady. «Biz balamyzdyń ólimine qatysty eshqandaı shaǵymymyz joq ekenin, sondyqtan mazamyzdy almaýdy polısııadan surap jazǵan edik. Biraq olar bizdi tyńdamaı, ólikti qorlaǵan bolyp otyr. Bul júgensizdik», - dedi áıel.
Buǵan polısııadaǵylardyń da óz ýájderi boldy. Olar ózderiniń bul týraly marqumnyń týǵan-týystaryna eskertilgenin, tipti eksgýmasııa qorytyndysy týraly qaýlyny da tapsyrmaq bolǵandaryn jetkizdi. Biraq olar budan bas tartqan. «Marqumnyń týystaryna eksgýmasııa óndirisi týraly aldyn ala eskertildi. Alaıda, olar kóshirmeni alýdan bas tartty», - dedi Atyraý prokýratýrasy bólim bastyǵynyń orynbasary Aman Dúısenǵalıev.
Anyqtalǵandaı, marqum bir qylmystyq iske kýá retinde tartylǵan. Tergeý málimeti boıynsha, polıseıler oǵan qysym kórsetken. Al jigit buǵan shydamaı, asylyp qalǵan.
Osyǵan oraı polıseılerdiń ústinen qylmystyq is qozǵalǵan. Al tergeýdi aqyryna deıin jetkizý úshin eskgýmasııa jasaýǵa týra kelgen.
Qurysh Nurymbet.
Derekkóz: KTK.
Foto: KTK.