Búgin Halyqaralyq Túrki akademııasynyń prezıdenti Darhan Qydyráli Qazaqstan Respýblıkasynyń Marokko Koroldigindegi Tótenshe jáne О́kiletti elshisi jáne ISESCO janyndaǵy Turaqty ókili Sáýlekúl Saılaýqyzymen kezdesti. Sonymen qatar kezdesýge akademııa vıse-prezıdenti Fızýlı Madjıdlı qatysty, dep habarlaıdy Egemen.kz akademııanyń baspasóz qyzmetine silteme jasap.
Akademııanyń jańa ǵımaratyna arnaıy kelgen elshi Sáýlekúl Saılaýqyzy Túrki mýzeıi men kitaphanasyn aralap kórip, uıymnyń jumysymen tanysty.
Kezdesýde taraptar Túrki Akademııasy men ISESCO arasyndaǵy memorandýmǵa sáıkes, birlesken is-sharalar ótkizý jóninde pikir almasty. Akademııa basshysy Shyǵys oıshyldary Ál-Farabı men Bırýnı muralaryn nasıhattaýǵa arnalǵan ortaq jobalardy uıymdastyrý jóninde oı bólisti.
О́z kezeginde mártebeli meıman Halyqaralyq Túrki akademııasynyń túrki áleminiń ǵylymı ıntegrasııasy baǵytyndaǵy jumysyn joǵary baǵalady.
Kezdesý sońynda Darhan Qydyráli elshi Sáýlekúl Saılaýqyzyna rızashylyǵyn bildirip, Akademııanyń baǵaly basylymdaryn tartý etti.
Aıta ketý kerek, Halyqaralyq Túrki Akademııasy ıslam álemindegi ǵylymı jáne mádenı ıntegrasııany úılestirýshi ISESCO uıymymen arnaıy memorandým arqyly tyǵyz yntymaqtastyq baılanys ornatqan.
Sonymen qatar, Túrki akademııasy Islam álemindegi ǵylym men mádenıetti úılestirýge jaýapty, 52 múshe memleketti biriktiretin Islamdyq bilim, ǵylym jáne mádenıet uıymyna (ISESCO) baqylaýshy mártebesin alǵan alǵashqy halyqaralyq uıym sanalady.