Kókshetaý medısınalyq kolledjiniń «Meıirbandylyq jáne erjúrektilik» qoǵamdyq murajaıy 1982 jyly qala jurtshylyǵy men oqýshylardyń bastamasymen ashylǵan bolatyn. Bul – Florens Naıtıngeıl atyndaǵy medalmen marapattalǵan meıirbıkelerge arnalǵan álemdegi jalǵyz murajaı.
– Medal 1854-1856 jyldary Qyrym soǵysy kezinde meıirbandylyq meıirbıkeleriniń otrıadyn bastaýshy aǵylshyn sanıtarynyń atyn ıelenýde, – deıdi bizben áńgimesinde murajaı keńesiniń tóraıymy, kolledj dırektory, medısına ǵylymdarynyń doktory Svetlana Muratbekova. – Álemniń barlyq túkpirinde bul medalmen 1408 meıirbıke marapattalǵan, sonyń ishinde beseýi Qazaqstan Respýblıkasynan. Olar: Antonına Dmıtrıeva, Rázııa Ysqaqova, Anna Dmıtrıenko, Marııa Smırnova jáne Vera Shırokaıa.
2011 jyly bizdiń kolledjdiń túlegi, Sankt-Peterbýrg qalasyndaǵy narkologııa aýrýhanasynyń bas meıirbıkesi Lıýbov Klokova F.Naıtıngeıl atyndaǵy medalmen marapattaldy. Bul oqıǵa erliktiń beıbit kúnderde de jalǵasyn tabatynyn aıǵaqtaıdy. Al 1990 jyly qoǵamdyq murajaı «halyqtyq» ataǵyna ıe boldy. Murajaıdyń arnaıy tósbelgisi bar. Ol biliktiligimen kózge túsken tańdaýly meıirbıkelerge tabystalyp, esimi murajaıdyń Qurmet kitabyna engiziledi. Búgingi kúni 77 meıirbıke osy marapatqa ıe bolyp otyr.
Murajaı keńesi «Meıirbandylyq» volonterlik qozǵalysy boıynsha arnaıy baǵdarlama ázirlep, jemisti jumys atqarýda. Onyń basty maqsaty qalanyń emdeý uıymdarymen tyǵyz qarym-qatynas ornatyp, naýqastar men múgedekterge kómek kórsetý. Sondaı-aq, eriktiler qozǵalysynyń belsendi múshelerine Uly Otan soǵysynyń ardageri, F.Naıtıngeıl atyndaǵy medal laýreaty, M.P.Smırnovanyń atyndaǵy shákirtaqy taǵaıyndalǵan.
Kókshetaý medısınalyq kolledji óz shákirtteriniń bilim órisin keńitý men emdeý sharalarynyń ozyq tájirıbelerin nasıhattaýda ónege tanyta bilýde. Máselen, 2011 jyldyń sáýirinde medısınalyq kolledjderdiń oqý baǵdarlamasy sheńberinde Halyqaralyq gýmanıtarlyq quqyqty ıntegrasııalaý suraqtary boıynsha respýblıkalyq semınar-keńesi ótkizildi. Al 2012 jyly qoǵamdyq murajaılar arasynda bolǵan oblystyq baıqaýda kolledj murajaıy 1-orynǵa ıe boldy.
Byltyrǵy 13 aqpanda kolledj bazasynda Qazaqstan Respýblıkasy medısınalyq kolledjderine arnalǵan Halyqaralyq gýmanıtarlyq quqyq (HGQ) máseleleri boıynsha online rejiminde konferensııa ótti.
Munda Uly Otan soǵysy jáne eńbek ardagerlerimen, Aýǵanstan soǵysyna qatysýshylarmen, kolledjdiń «Qurmet belgisi» tósbelgisiniń ıegerlerimen kezdesýler, erlik jáne patrıottyq sabaqtary, taqyryptyq ekskýrsııalar, Florens Naıtıngeıl jolyn jalǵastyrýshylarmen hat almasýlar, «Ashyq esik kúnderi» turaqty túrde ótkizilip turady.
Baqbergen AMALBEK,
«Egemen Qazaqstan».
KО́KShETAÝ.