Qazaqstan Respýblıkasy Prezıdenti Ákimshiliginiń kelisimi boıynsha Ishki ister mınıstriniń buıryǵymen Ulttyq ulan akademııasy bastyǵynyń laýazymyna Artýr Toqyshev taǵaıyndaldy, dep habarlaıdy Egemen.kz IIM baspasóz qyzmetine silteme jasap.
Ulttyq ulan Bas qolbasshylyǵynyń jeke quramyna Akademııanyń jańa bastyǵyn QR Ishki ister mınıstriniń orynbasary – Ulttyq ulannyń Bas qolbasshysy Erkin Botaqanovtyń ózi tanystyrdy.
Sonymen qatar quqyqtyq tártip áskeriniń Bas qolbasshysy Artýr Toqyshevke tájirıbesi mol ofıser dep minezdeme berip, Akademııanyń jańa basshysyna qoıylǵan barlyq mindetterdi laıyqty oryndaıtynyna senim bildirdi.
«Ulttyq ulanda polkovnık Artýr Toqyshevti barlyǵy jaqsy biledi. Ol 5513, 7552, 6654 áskerı bólimderiniń komandıri boldy. QR Qarýly Kúshteri Áskerı akademııasy men QR Tuńǵysh Prezıdenti – Elbasy atyndaǵy Ulttyq qorǵanys ýnıversıtetiniń tyńdaýshysy boldy. Artýr Qalıaqparuly Ulttyq ulan úshin ofıser kadrlaryn daıarlaý jónindegi kadr saıasatyn qalyptastyrýǵa jáne júrgizýge úlken úles qosatynyna senimdimin», dedi Erkin Botaqanov.
Artýr Toqyshev Reseı IIM Ishki áskerleriniń joǵary áskerı komandalyq ýchılıshesiniń kýrsantynan Ulttyq ulan Bas qolbasshylyǵy Bas shtaby bastyǵynyń birinshi orynbasaryna deıin qyzmet jolynan ótti. Ár jyldary Ulttyq ulannyń 5513 (Taraz qalasy), 7552 (Almaty qalasy), 6654 (Qarakemer kenti) áskerı bólimderine basshylyq etti. Ulttyq qorǵanys ýnıversıtetiniń jedel óner jáne taktıka kafedrasynyń aǵa oqytýshysy boldy. 2015 jyldyń qazan aıynan bastap Ulttyq ulan Bas qolbasshylyǵy Bas shtaby bastyǵynyń birinshi orynbasary qyzmetin atqardy.
Sondaı-aq atalǵan kúni Ulttyq ulan Bas qolbasshylyǵynyń memlekettik qupııalardy qorǵaý basqarmasynyń jańa bastyǵy – Dinmuhamed Myrzataev ta jeke quramǵa tanystyryldy.