Almaty qalasynyń ákimi Ahmetjan Esimov Uly Otan soǵysyndaǵy Jeńistiń 69 jyldyq merekesine oraı 14 ardagerge páter kiltin tabys etti.
Uly Jeńistiń elimizdegi eń basty mereke ekendigin erekshe atap ótken shahar basshysy ardagerlerge baǵa jetpes erlikteri úshin alǵys bildirdi.
– Bizder elimizdiń bolashaq urpaǵy úshin jasaǵan sizderdiń eren eńbekterińizdi eshqashan umytpaımyz, – dedi Ahmetjan Esimov. – Túrli syrtqy máseleler men álemdik ekonomıkalyq daǵdarysqa qaramastan memleket óziniń áleýmettik mindetin únemi oryndap keledi. Qazaqstan Prezıdenti Nursultan Nazarbaevtyń Jarlyǵymen bıylǵy jyldyń 1 sáýirinen bastap zeınetaqy 14 paıyzǵa ósti. Máslıhattyń sheshimi boıynsha Almatyda turatyn ardagerlerge arnaıy áleýmettik kómek tólenetin bolady.
Tek 5 jyldyń ishinde ǵana qalada Uly Otan soǵysyna qatysýshylarǵa 153 páter berilgen. Osylaısha, búgingi tańda Almaty qalasy boıynsha úıge zárý UOS ardargerleri baspanamen qamtyldy. Sondaı-aq, UOS ardagerlerin Jeńis kúnimen «Nur Otan» partııasy Almaty qalalyq fılıaly da saltanatty túrde quttyqtady. Shara barysynda 15 maıdangerge Qazaqstan Prezıdenti Is basqarmasynyń medısınalyq ortalyǵyna qarasty «Almaty Resort» klınıkalyq shıpajaıynyń prezıdenti, «Nur Otan» partııasy Almaty qalalyq fılıaly saıası keńesiniń múshesi Qanat Tósekbaev osy demalys úıine 10 kúndik tegin joldama syıǵa tartty.
– Memleket basshysy Nursultan Ábishuly Nazarbaev bizdiń ardagerlerimizge únemi qoldaýyn kórsetip turady. Maıdangerlerdiń qatary jyl saıyn sırep keledi. Almatyda qazir 1006 ǵana ardager qaldy. Jeńis kúnin merekeleý aıasynda «Nur Otan» partııasy Doktrınasynyń basty qundylyqtaryn negizge ala otyryp, urpaqtar sabaqtastyǵy men qoǵamdaǵy yntymaqtastyq sezimdi, dástúrlik ǵuryptardy, Uly Otan soǵysynyń ardagerlerine degen syı-qurmetti arttyrýǵa baǵyttalǵan «Ardagerlerdi ardaqtaıyq» jobasyn keńinen júzege asyrýda, – dep atap ótti Almaty qalasy ardagerler keńesiniń tóraǵasy Erǵalı Shaıhýtdınov.
Gúlzeınep SÁDIRQYZY,
«Egemen Qazaqstan».
Sýretti túsirgen Serik О́TEGENULY