ATYRAÝ. 12 mamyr. Taı boksynan Qazaqstan quramasy sapynda álem chempıonatynda óner kórsetken atyraýlyq úsh sportshy altyn medal aldy. Bul týraly «Qaısar» sport klýby habarlady. Mýaıtaı boksynan Malaızııada ótken jahandyq jarysta 76 eldiń sportshylary baq synasty. Osy synda elimizdiń namysyn abyroımen qorǵaǵan sportshylardyń úsheýi altyn medal enshiledi. Elimizdiń baıraǵyn jelbiretip, ánuranyn áýeletken Ábil Ǵalıev, Álisher Muhtarov jáne Elaman Saıasatov Atyraýdaǵy «Qaısar» jáne «Alan» sport klýbtarynda jattyǵady. Qazaqstan quramasyna buıyrǵan jeti qola medaldyń birin atyraýlyq taǵy bir sportshy Abylaı Quralbaev ıelendi. El qorjynyna úsh altyn jáne bir qola medal salǵan atyraýlyq sportshylardy M.Ǵalıev, B.Muhambetálıev, B.Ámirjanov jáne A.Rahman syndy tanymal jattyqtyrýshylar jarysqa daıyndady. Joldasbek Shópeǵul. Derekkóz: «Qaısar» sport klýby. Foto: «Qaısar» sport klýby.