ASTANA. 13 sáýir. Qyzylorda temirjol vokzaly syrtyndaǵy skverge halyq batyry Janqojanyń eskertkishi qoıylady. Bul týraly Qyzylorda oblysy Qazaly aýdany ákimdiginiń baspasóz qyzmetkeri Balgúl Mámen habarlady.
Atalmysh shara bıyl Janqoja Nurmuhammedulynyń týǵanyna 240 tolýyna baılanysty jasalyp otyr. Ol 2012 jylǵy 1 tamyzda oblystyq jańa eskertkishterdi ornatýdy retteý jáne tarıhı-mádenı mura nysandaryn, tarıh jáne mádenıet eskertkishteri dep taný, sondaı-aq olardy mártebesinen aıyrý týraly qorytyndy ázirleıtin oblystyq komıssııa otyrysynda qabyldanǵan sheshimge saı jasalady. Otyrysta Janqoja Nurmuhammeduly eskertkishiniń konkýrsyna 4 eskızdik jobasy qaralyp, memlekettik komıssııanyń qaraýyna usynylǵan bolatyn.
Alaıda, memlekettik komıssııa eskertkish ornatýǵa qajetti qarjy máselesi men jer telimi tolyq sheshilmegendikten, jobany komıssııaǵa qaıta usyný tapsyryldy.
Osyǵan baılanysty tıisti jumystar júrgizilip,smetalyq-jobalaý qujaty boıynsha 59,7 mln. teńge qarjysy «Oblystyq tarıhı-mádenı eskertkishterdi qorǵaý jónindegi» memlekettik mekemesine oblystyq bıýdjetten bólindi. Eskertkishti ornatý úshin Qyzylorda qalasyndaǵy Jibek joly men Amangeldi kósheleriniń qıylysyna qala ákiminiń sheshimi shyǵarylyp, memlekettik komıssııa otyrysyna qaıta usynyldy.
Memlekettik komıssııanyń 2014 jylǵy 9 sáýirdegi hattamalyq qorytyndysyna sáıkes músinshi J.Ismaǵulovtyń eskızdik jobasyn eń úzdik dep tanyldy.
Memlekettik komıssııa otyrysynda Janqoja batyr eskertkishiniń eskızdik jobasy qaıta qaralyp, avtory A.Kenenbaevtyń «Halyq batyry» atty at ústindegi jobasy qabyldandy. Bul eskertkish Qyzylorda qalasynyń ortalyq vokzal alańyna qoıylatyn bolyp otyr.
Sáken Maılybaı.
Derekkóz: Qazaly aýdandyq ákimdiginiń baspasóz qyzmeti.
Foto: Qazaly aýdandyq ákimdiginiń baspasóz qyzmeti.