Kúnniń aptap ystyǵy áli de basylmaı turǵan Túrkistan oblysynda jaz boıy dala órtiniń oryn alý joǵary qaýpi saqtaldy. Kúzdiń alǵashqy kúnderi de bul qaýip seıilmeı tur. Jýyrda oblysta 10 gektar jerde qurǵaq shóp pen buta órtendi. Dala órti 8 saǵat ishinde sóndirildi. Tilsiz jaýmen kúreske 70 adam jáne 8 birlik tehnıka jumyldyryldy.
Mamandar órtti sóndirý barysynda jaısyz meteojaǵdaı kedergi keltirgenin aıtýda. Jyldamdyǵy 25 m/s-tan asatyn qatty jel turǵandyqtan, órt úlken aýmaqqa tez jaıylǵan. Qaza bolǵandar men zardap shekkender joq. Oblys aýmaǵynda órt qaýipti aımaqtarda kezekshilik uıymdastyrylǵan. Jalpy, Túrkistan oblysynda jyl basynan beri 289 órt oqıǵasy bolǵan. Saldarynan 6 adam qaza bolyp, 5 adam túrli dene jaraqatymen aýrýhanaǵa jetkizilgen. Jalpy, somasy
1 mlrd 63 mln 838 myń teńge bolatyn materıaldyq shyǵyn kelgen. «О́rt shyqqan oryndar boıynsha eń joǵary kórsetkish turǵyn úı sektorynda tirkelip otyr. Oblys aýmaǵynda 184 úıde órt bolǵan, 53 kólik órtengen. Qalǵan órtter óndiristik ǵımarattar men qurylystarda, bilim berý mekemeleriniń ǵımarattary men ákimshilik-qoǵamdyq nysandarda bolǵan. Sondaı-aq aýyl sharýashylyǵy, densaýlyq saqtaý obektileri men saýda oryndarynda, taýar saqtaý qoımalarynda tirkeldi», dedi óńirlik kommýnıkasııalar qyzmetinde ótken brıfıngte tótenshe jaǵdaılar departamenti bastyǵynyń orynbasary Erik Sarybaev.
Aıta ketelik, jazdyń sońynda Jetisaıdaǵy «Kúlparshyn» bazarynan órt shyǵyp, saldarynan 450-ge jýyq kásipkerdiń zattary tolyǵymen janyp ketken edi. О́rttiń shyǵý sebebin anyqtaý maqsatynda júrgizilgen tekserý barysynda zań buzýdyń 9 faktisi anyqtalǵan. Osyǵan oraı Jetisaı aýdany prokýratýrasynyń usynysy boıynsha bazar ıesine eskertý túrinde ákimshilik shara qoldanyldy. Búginde «Kúlparshyn» bazary órt qaldyqtarynan tazartylyp, jańa nysannyń qurylys jumystary júrgizilýde.
Túrkistan oblysy