Búgin elimizde jańa Konstıtýsııany qabyldaý máselesine arnalǵan respýblıkalyq referendým ótip jatyr. Bul mańyzdy saıası naýqanǵa Ulttyq ulannyń áskerı qyzmetshileri de belsendi qatysýda, dep habarlaıdy Egemen.kz.
Ulttyq ulannyń áskerı bólimderinde referendýmdy joǵary deńgeıde ótkizý úshin barlyq jaǵdaı jasaldy. Jalpy sany 36 saılaý ýchaskesi ashylyp, áskerı qyzmetshilerdiń konstıtýsııalyq quqyǵyn júzege asyrýǵa múmkindik berildi. Daýys berý rásimi zań talaptaryna saı, ashyqtyq pen aıqyndyq qaǵıdattary negizinde uıymdastyryldy.
Erlan Qarın: Qazaqstandyqtar el bolashaǵyn tańdaý týraly sheshim qabyldaýda
Ishki ister mınıstriniń orynbasary – Ulttyq ulannyń Bas qolbasshysy general-maıor Ańsaǵan Baltabekov alǵashqy bolyp, №266 saılaý ýchaskesinde daýys berdi.
Bul kún ásirese 5573 áskerı bóliminiń qatardaǵy jaýyngeri Artýr Iаrovoı úshin aıryqsha este qaldy. Sebebi ol ómirinde alǵash ret daýys berip otyr jáne bul mańyzdy sát onyń týǵan kúnimen tuspa-tus keldi.
Qazaqstanda jańa Konstıtýsııa jobasy boıynsha daýys berý bastaldy
Artýrdyń aıtýynsha, áskerı qyzmette júrip el taǵdyryna qatysty saıası naýqanǵa qatysý – úlken jaýapkershilik. Onyń sózinshe, mundaı sát ár azamattyń el bolashaǵyna beıjaı qaramaıtynyn kórsetedi.
Referendýmǵa ofıserler, kelisimshart boıynsha áskerı qyzmetshiler, olardyń otbasy músheleri, ardagerler jáne merzimdi qyzmettegi sarbazdar qatysyp jatyr. Kóptegen jas sarbaz úshin bul alǵashqy daýys berý tájirıbesi boldy.
Ulttyq ulannyń Bas qolbasshysy týǵan kún ıesi men birinshi ret saıası naýqanǵa qatysyp otyrǵan áskerı qyzmetshilerdi quttyqtap, azamattyq belsendilik tanytqandary úshin alǵys bildirdi.
Osylaısha Ulttyq ulan sarbazdary referendým kúni tek áskerı antqa adal qyzmet etetinin ǵana emes, el ómirindegi mańyzdy sátterde azamattyq ustanymyn da aıqyn kórsetti.