Aqtóbe qalasyndaǵy «Á.Marǵulan atyndaǵy 71JBBOM» KMM-niń qazaq tili men ádebıeti páni muǵalimi Aıjan Ádilova ózi eńbek etetin bilim ordasynda zańsyz áreketter oryn alyp jatqanyn aıtyp shaǵymdandy. Muǵalim bul týraly áleýmettik jelide jarııalady, dep habarlaıdy Egemen.kz.
Jas muǵalim sońǵy birneshe jylda basshylyq tarapynan qysymǵa ushyrap kele jatqanyn ashyp aıtty.
«Jumys ornynda basshy tarapynan psıhologııalyq qysym men ádiletsizdikke tap bolyp kelemin. Osy jaǵdaıǵa baılanysty densaýlyǵyma zııan kelip, em qabyldaýǵa májbúr boldym. Men túrli bilim salasyna qarasty mekemelerge, quzyrly organdarǵa birneshe ret júgindim. Sotqa deıin baryp, óz quqyǵymdy qorǵap, jeńip shyqtym. Ustazdardan aqsha jınaý, jumys ornynda psıhologııalyq turaqsyz orta qalyptastyrý, ózine júktelgen sabaqtardy bermeý jáne úkimetten aılyq esebinde aqsha alyp otyrǵany, ony keri qaıtarmaýy t.b osy sekildi máseleler de tekseris barysynda rastaldy. Alaıda tekseristen keıin de maǵan jasalatyn qysymdar toqtamady», deıdi Aıjan Ádilova.
Onyń aıtýynsha, onyń is-áreketi Ádep keńesinde qaralǵan.
«О́zimdi qorǵaý maqsatynda jasalǵan eskertý sıpatyndaǵy jazbalarym «ádepsizdik» retinde baǵalanyp, sonyń negizinde «sógis» tártiptik jazasy qoldanyldy», deıdi ol.
Muǵalim ár jazbasynda ádildikti talap etetinin jáne óziniń bedelin qaıta qalpyna keltirgisi keletinin jazady.
«Men jalǵyz emespin. О́zge de muǵalimderge qysym jasaldy, jasalyp ta keledi. Men óz ar-namysymdy, pedagog retindegi bedelimdi jáne zańdy quqyǵymdy qorǵaýdy jalǵastyramyn. Toqtamaımyn. Ustazǵa qurmet - qoǵamǵa qurmet», dep jazdy muǵalim.
Ádildik bar jerde jemqorlyqqa oryn joq
Atalǵan jaıtqa baılanysty Aqtóbe qalalyq bilim bólimi muǵalimniń áleýmettik jelidegi jazbalaryna jaýap berdi.
«Atalǵan másele Aqtóbe qalasynyń bilim bóliminiń baqylaýynda. Qazirgi tańda máseleniń mán-jaıyn anyqtaý maqsatynda zerdeleý jumystary júrgizilýde. Qorytyndysy boıynsha tıisti aqparat qosymsha habarlanatyn bolady», delingen jazbada.
Aıta keteıik, «Ádiletti jáne Progressıvti Qazaqstannyń Halyqtyq Konstıtýsııasy úshin» Jalpyulttyq koalısııasynyń alǵashqy jıynynda Respýblıkalyq advokattar alqasynyń tóraǵasy Madı Myrzaǵaraev jańa Konstıtýsııadaǵy «Zań men Tártip» qaǵıdasynyń mánin jáne advokattyq ınstıtýttyń qoǵamdaǵy ornyn týraly aıtty.