Jambyl oblysy, Merki aýylynda qazaqy tazy tuqymy boıynsha tuqymdyq baıqaý ótti. Qazaqstan kınologtar odaǵy uıymdastyrǵan sharaǵa 50-ge jýyq tazy tirkelgen, dep habarlaıdy Egemen.kz.
Saraptamalyq baǵalaý nátıjesinde 17 tazy «úzdik», 4 tazy «óte jaqsy» degen baǵa aldy. Qorytyndy boıynsha 21 tazyǵa tuqymdyq tegi týraly kýálik beriledi.
Baıqaý barysynda sarapshylar ıtterdiń resmı standartqa sáıkestigin baǵalap, olardyń tuqymdylyǵyn rastaý jáne esepke qoıýǵa qajetti qujattardy rásimdedi. It ıeleri mamandarǵa tuqym erekshelikteri, ósirý jáne qujattandyrý tártibi boıynsha suraqtaryn qoıdy.
Qatysýshylar balalarymen jáne jaqyndarymen keldi. Balalar sarapshylardyń jumysyn baqylap, tazyny tekserý prosesine qyzyǵýshylyq tanytty.
«Merkide ótken tuqymdyq baıqaý qazaqy tazyǵa degen qyzyǵýshylyqtyń tek ósirýshiler arasynda ǵana emes, qarapaıym ıt ıeleri, otbasylar men jastar arasynda da artyp kele jatqanyn taǵy bir ret kórsetti. Biz úshin adamdardyń balalarymen birge kelýi, suraq qoıýy, tuqym standartyn túsinýge jáne ıtterin durys rásimdeýge umtylýy óte mańyzdy», dedi Qazaqstan kınologtar odaǵynyń Prezıdenti Baýyrjan Serikqalı.
Uıymdastyrýshylardyń aıtýynsha, mundaı is-sharalar jas urpaqtyń qazaqy tazy tuqymyna degen qyzyǵýshylyǵyn arttyryp, bolashaqta jańa kınologtar men ósirýshilerdiń qalyptasýyna yqpal etedi.
Eske sala keteıik, elimizde jeti qazynanyń biri sanalǵan tirshilik ıesine arnaıy mereke engizilgen.
Tazy tuqymyn tanytýǵa septigin tıgizgeni úshin jýyrda Memleket basshysy Halyqaralyq kınologııa federasııasynyń prezıdenti Tamash Iаkkelge alǵys aıtqan bolatyn.