Bas qalamyzdyń sánin keltirip, symbatyn arttyryp turǵan záýlim saraılar jeterlik. Ár aýdannyń ózine tán erekshe ǵımarattary da bar. Sonyń biri – 2002 jyly 29 tamyzda esigin aıqara ashqan elordamyzdyń sımvoly – «Báıterek» monýmentine bıyl 20 jyl tolyp otyr. Balalar jylynyń aıasynda Nur-Sultan qalasy ákimdigi, «Altyn dombyra» ulttyq óner ortalyǵy jáne «Báıterek» monýmenti birlesip, «Báıterektiń» 20 jyldyǵyna – 20 kúı atty is-shara uıymdastyrdy.
Memleket basshysy Qasym-Jomart Toqaev: «Qazaq pen dombyra – bir-birinen bóle-jarýǵa bolmaıtyn egiz uǵym. Dombyra – kóne zamannyń ańyzdaryna arqaý bolǵan kıeli aspap. «Aqsaq qulan» kúıiniń shyǵý tórkinin bilmeıtin qazaq kemde-kem. Ejelgi dáýirden jetken qasterli dombyra urpaqtan-urpaqqa mıras bolyp keledi. Qazaq san ǵasyrlyq shejiresiniń kýási bolǵan qasıetti aspapty boıtumaryna balaǵan. Qazirgi tilmen aıtsaq, bul – bizdiń ulttyq brendimiz», degen edi.
«Aqyn Qadyr Myrza Áliniń «Naǵyz qazaq qazaq emes, naǵyz qazaq – dombyra» degen sózi bar. Sondyqtan búgingi is-sharanyń negizgi maqsaty – jas býyn ókilderiniń qatysýymen «Báıterektiń» eń bıik núktesinde qazaqtyń dombyrasyn kúmbirletip, kúı shertý. Bárińizge málim, bıyl Memleket basshysy Qasym-Jomart Toqaev Balalar jylyn jarııalaǵan bolatyn. Bizdiń de maqsatymyz osyndaı daryndy, qabiletti balalardy qoldaý, ári qaraı ónerlerin shyńdaýǵa yntalandyrý», dedi «Báıterek» monýmentiniń dırektory Ádil Orynbasaruly.
Báıterek 20 jyl boıy mıllıondaǵan adamǵa, elorda turǵyndary men qonaqtaryna esten ketpes áser qaldyrǵany anyq. Monýment biregeı ǵımarat bola otyryp, onyń tamyry Qazaqstannyń ótken tarıhyn qadirleıtin, búginine berik tirek bolatyn jáne nyq ári senimdi júzege asyrylyp jatqan bolashaǵyn baǵalaıtyn memleketti beıneleıdi.
«Osydan biraz ýaqyt buryn shákirtterimizben Táýelsizdiktiń 30 jyldyǵyna oraı 30 kúı oryndaǵanbyz. Búgin mine, osy dástúrdi úzbeı jalǵastyryp, ózimizdiń ortalyqtyń jalyndy jastarymen kúı shashýymyzdy alyp kelip otyrǵan jaıymyz bar. Sebebi búgin – mereke. Elordanyń esiginen engen árbir meımannyń keletin keremet jeri – «Báıterek» monýmentine 20 jyl tolyp otyr. «Báıterek» tek qana Esil aýdanynda ornalasqan qonaqtardyń kelip-ketetin orny emes, bul memleketimizdiń, táýelsizdigimizdiń sımvoly dep qaraýymyz kerek. «Báıterekke» qarap búgingi baldyrǵandarymyz bıik bolýǵa, asqaq bolýǵa talpynady. Kóne tarıhymyzdy kóz aldymyzǵa ákeletin qasıetti qara dombyramyz desek, ony úırenýge, shertýge qyzyqqan balalarymyz eldiń erteńgi bolashaǵy. Qazirgi jahandaný dáýirinde, túrli aqparattar tolassyz aǵylyp jatqan kezeńde ultynyń uly murasyn ulyqtap, babasynan qalǵan baǵaly aspapty janyna serik etken jastar ulttyq ımmýnıtetpen qarýlansa, ádiletti Qazaqstannyń jarqyn bolashaǵyn jasaıdy dep oılaımyn. Bizdiń ortalyq ta osy maqsat jolynda eńbek etýde», dedi ánshi, «Altyn dombyra» ulttyq óner ortalyǵynyń kórkemdik jetekshisi Eskendir Ibragım.
Uıymdastyrýshylardyń sózine qaraǵanda, is-sharanyń basty maqsaty – óskeleń urpaqqa rýhanı-adamgershilik jáne patrıottyq tárbıe berý, belsendi azamattyq ustanym men patrıotızmdi, mańyzdy rýhanı-adamgershilik jáne áleýmettik qundylyqtardy, qazaq halqynyń ulttyq ádet-ǵuryptaryn dáripteý. «Báıterek» monýmentine qydyryp kelgen qala qonaqtary da kúı tyńdap rýhanı lázzat alǵandaryn jasyrmady.
«Búgin ózimniń otbasymmen, nemerelerimmen «Báıterekke» keldim. Ishine kirgennen bastap qulaǵyma dombyranyń úni keldi. Joǵary qabatqa kóterilgende ádemi kıingen, qolyna dombyrasyn ustaǵan jastardy kórgende, olardyń shertken «Balbyraýyn», «Kelinshek», «Erke sylqym» kúılerin tyńdaǵanda tipti tolqydym. Uıaly telefonnan, teledıdardan kúı tyńdap júrmiz ǵoı, biraq kórermen bolǵan bólek eken. Erekshe áser aldym. Elordamyzǵa kelgen saıyn keletin «Báıterek» monýmentine 20 jyl tolǵan eken. Osy aralyqta qanshama qonaq keldi deseńizshi. Eldigimizdiń erekshe sımvoly ispetti qasqaıyp turǵan «Báıteregimiz» bárimizge maqtanysh syılaıdy. Búgingi kúı shertken búldirshinderge jarqyn bolashaq tileımin», dedi Almatydan qydyryp kelgen Qarlyǵash esimdi qonaq.