Batys Qazaqstan oblysyndaǵy Kardon kentiniń turǵyny óz ýchaskesinde 71 sora butasyn ósirgen, dep habarlaıdy Egemen.kz Polisia.kz-ke silteme jasap.
«Karasora-2022» jedel aldyn alý is-sharasyn ótkizý barysynda BQO PD esirtki qylmystaryna qarsy is-qımyl basqarmasynyń qyzmetkerleri Kardon kentinde 53 jastaǵy azamatty ustady.
Tintý jumystary barysynda kúdiktiniń úı aýlasynda esirtkiniń 71 butasy tabyldy.
«Ustalǵan azamat qoranyń ishinde keptirilgen marıhýanany saqtaǵan. Kúdikti kenttegi úıdi qarasora ósirý úshin arnaıy satyp alǵanyn moıyndady. Anyqtalǵandaı, esirtki tuqymdary Gollandııadan tapsyrys arqyly jetken», delingen habarlamada.