ASTANA. 15 mamyr. Pavlodar oblysy Aqsý aýdanyndaǵy Evgenevka aýylynda 14 jasar Anastasııa Sharıpovany aıýandyqpen óltirgen Vıktor Baharev 25 jylǵa sottaldy. Bul týraly Tengrinews.kz tilshisi habarlady.
Keshe ótken alqa bıler soty ony jasóspirim mektep oqýshysyn óltirip, zorlady degen tujyrymǵa toqtady.
«Sottyń sheshimimen Vıktor Baharev 25 jyl merzimge bas bostandyǵynan aıyryldy», - dedi sýdıa Qadyrbek Satabaev. Qylmysker merzimin qatań rejimdegi kolonııada óteıtin bolady. Buǵan qosa, sottaýshy ózi óltirgen qyzdyń otbasyna 2 mln. teńge kóleminde ótemaqy tóleıdi. Osylaısha sot aıyptaýdy tolyq maquldap shyqty.
Aıyptalýshynyń qorǵaýshysy Baýyrjan Azanovtyń aıtýyna qaraǵanda, qaıtys bolǵan qyzdyń sheshesi qylmyskerdi ólim jazasyna kesýdi suraǵan. Al Vıktor Baharevtan sońǵy sózin aıtýdy suraǵanda, ol Nastıa Sharıpovany óltirmegenin aıtyp, kinásin moıynna almaǵan.
Buǵan deıin habarlanǵandaı, Baharevke qatysty sot prosesi bıylǵy jyldyń aqpan aıynda bastaldy. Aıyptalýshyny Azanovpen birge onyń ápkesi Antonına Zvereva da qorǵady.
Eske sala keteıik, 2013 jyly 21 qazanda Evgenevka aýylyndaǵy orta mekteptiń 14 jasar oqýshysy Anastasııa Sharıpova mektepten shyǵyp, úıine qaıtyp bara jatqan jolda joǵalyp ketken. Arada eki apta ótkende, 3 qarasha kúni qyzdyń máıiti ózi turatyn úıden 250 metr qashyqtaǵy shuńqyrdan shyqqan. Al 6 qarashada polıseıler kisi ólimine qatysy bar degen kúdikpen sol aýylda turatyn 20 jasar Vıktor Baharevti qamady.
Tergeý barysy kórsetkendeı, qyzdyń tabylǵany jóninde málimet taraǵanda, ol aldymen asylyp ólmekshi bolyp, artynsha qashyp ketýge áreket jasaǵan. Vıktor Baharevti ustaǵanda, ol istegen qylmysyn moıyndaǵan. Oǵan adam óltirdi jáne zorlady degen aıyp taǵyldy. Alaıda, Baharevtyń týystary onyń kisi óltirgenine senbeıtinin, qysym bolǵannan keıin ǵana kináni óz moınyna alǵanyn aıtqan. Onyń bul qylmysqa qatysy baryn DNQ qorytyndylary dáleldep bergen.
Qurysh Nurymbet.
Derekkóz: Tengrinews.kz.
Foto: Tengrinews.kz.