Dúnıede tek Qudaı muńsyz. Táńiriniń qudiretin kórem deseń taýǵa bar. Jalǵyzdyq Qudaıǵa jarasar. Tańǵy násip – Táńirden. Jyrtyq úıdiń Qudaıy bar. Qudaısyz qýraı synbaıdy. Osylaı jalǵasa beretin qazaqtyń Qudaı týraly sóziniń qashan, qaı ǵasyrda qoldanysqa engenin naqty bilmesek te, ázelden jaratylystyń syry men sıpatyn tereńinen tanýǵa qushtar ekenin kóremiz. Halqymyzdyń qanyndaǵy toleranttylyqtyń tamyry tabıǵatpen etene týǵan jaratylys tilin júrekpen túsinýde bolar, bálkim.
О́rkenıetter úılesiminiń úlken shańyraǵyna aınalǵan Qazaq elinde Álemdik jáne dástúrli dinder kóshbasshylarynyń VII sezi aıasynda jahannyń jan-jaǵynan taspıyq tartqan, daǵaraly aq sálde kıip, shapanyn shart býynǵan, jelbegeı jamylǵan tórtkúl dúnıeniń taqýalary, dinbasylary elordamyzda bas qosty. Dinder quryltaıynyń bıylǵy basty meımandarynyń biri Rım Papasy Fransısk te arnaıy kelip, Ádiletti Qazaqstan qurýdaǵy jańa bastamalarǵa, eldiń ósip-órkendeýine, damýyna degen aqjarma tilegi men kıeli duǵasyn arnap jatyr. Laıym qabyl bolsyn!
Osy oraıda Prezıdent Qasym-Jomart Toqaev aıtqandaı, Ortalyq Azııa elderi arasynda katolık qaýymynyń eń kóp ókili bizdiń elimizde turatynyn aıta ketken lázim. Sondaı-aq bıyl alaqandaı qala-memleket bolsa da, dúıim dúnıeni aýzyna qaratyp otyrǵan Vatıkan men Qazaqstan arasyndaǵy dıplomatııalyq qarym-qatynastyń ornaǵanyna 30 jyl tolyp otyr. Osy sezd alǵash shaqyrylǵan 2003 jyldan beri Rım Papasynyń eki márte konfessııaaralyq dıalogqa qatysýy Qasıetti Taqtyń Qazaqstannyń álemdegi kelisimdi saqtaý men turaqtandyrýdaǵy jan-jaqty izgi saıasatyn qoldaıtynyn kórsetedi.
Keshegi izgi júzdesýlerde Pontıfık qazaqtyń «Bereke basy – birlikte» degen támsilin tiline beker tıek etken joq. Biz de qazir shyrpy tıse laý ete qalatyn qýraǵan qaýdyń ortasynda qalǵandaı kúrdeli geosaıası kúı keship otyrǵan álemniń bir bólshegimiz. Bir týdyń astynda bolǵan burynǵy odaqtas elderdiń keıbiriniń arasyndaǵy alaýyzdyqqa araaǵaıyndyq kórsetý de osy sezge qatysyp jatqan qasıetti din ókilderiniń mıssııasy bolmaq. О́ıtkeni izgi senim eshýaqytta soǵysty qoldamaıdy, naqaq qan tógýdi aıyptaıdy. Sondyqtan Qasıetti Taqtyń qazaq támsilin eske alýy ultymyzdyń uıysyp otyrǵanyna tánti bolýy, beıbitshilikti saqtaýǵa úlgi qylýy dep túsindik.
«Búgingi eń basty qaýip-qater – kedeılik. Abaı osyny baıqaǵan. Ádiletsizdik, teńsizdik oryn alyp turǵan kezde senimniń bolýy qıyn», dedi Katolık shirkeýiniń basshysy. Fransısktiń bul sózi shyn máninde halyqshyl, adamzattyń aldaǵy ahýalyna alańdaýshylyq bildirgen úndeý. Sondaı-aq eldegi halyqtyń tabysyn arttyrý týraly bastamalarǵa dem beretin qoldaý.
Eń bastysy, elimizge jıyrma jyl buryn kelgen Rım Papasy II Ioann Pavel de Abaıdyń ǵaqlııasyn ana tilimizde eske alǵan-dy. Qazaq jeriniń qýǵyn-súrgin kórip, azapqa túsken, aıdalǵandar men qaharmandar jeri ekenin, oıshyldar men sýretkerler eli ekenin aıtyp, yntymaqtastyq pen beıbitshilik rýhynda eshteńeden taıynbaýǵa tilek bildirgen.
Mine, bir jarym ǵasyr buryn ǵana Shyńǵystaýdyń shoqtyǵynan shartarapqa oı júgirtken hakimniń asyl sózderin alty qurlyqqa jaıylǵan alyp dinniń qaıratkerleri elimizdiń tórine kelip aıtýy da aıryqsha tolqytady.
«Men dombyramen sózimdi, tilegimdi úılestirgim keledi», dep bastaǵan shynaıy oıyn Fransısk qazaq ult aspabynyń eki ishegi ejelgi zaman men osy ýaqyttyń syryn shertetinin, dombyranyń úni – qaıshylasqan álemniń, ıaǵnı jaýyzdyq pen meıirim, soǵys pen beıbitshilik, súreńsizdik pen sulýlyq arasyn jalǵaıtyn úılesim ekenin jetkizdi.
Pontıfık osy ushy-qıyrsyz Uly daladaǵy qıyndyqqa qaısarlyqpen qarsy turyp kele jatqan halqymyzdyń ómirsúıgish qasıetin aıtýda da kıeli aspaptyń til ushyna oralatynyna toqtalýy shyn máninde tula boıdy shymyrlatqan jyly aǵys syqyldy áser qaldyrady.
Din tazasyn oı tabar degen de osy shyǵar, ásili. Rım Papasynyń Qazaq eliniń tabıǵatyn qazaqy qalypta túsinýi qýantty. Bul bile bilgenge, elimizge, halqymyzǵa, dástúrimizge degen úlken qurmet!