Elimiz boıynsha tirkelmegen qarý-jaraq pen oq-dárilerdi satyp alý aksııasy Jambyl oblysynda da qarqyndy túrde júrgizilip, birer kún buryn is-shara tolyq aıaqtaldy. Aksııanyń basty maqsaty – atys qarýyn qoldanýmen jasalatyn quqyq buzýshylyqtardyń aldyn alý. Osy maqsatta Jambyl óńiri úshin respýblıkalyq bıýdjetten 10 mln 404 myń teńge bólingen.
Derekterge sensek, óńir turǵyndary polısııa qyzmetkerlerine uzyn sany 160 qarý tapsyrǵan. Olardyń ishinde 16 oıyq, 140 tegis uńǵyly jáne 4 travmatıkalyq qarý-jaraq bar. Polısııa qyzmetkerleriniń aıtýynsha, aksııanyń alǵashqy jyldarynda qolóner nemese sırek kezdesetin qarýlar tapsyrylǵan bolsa, qazir jurtshylyq negizinen týystarynan mura bop qalǵan, ań aýlaýǵa arnalǵan qarýdy ótkizip jatyr eken.
«Qarý-jaraq zattaryn óz erkimen tapsyrǵany úshin óńir turǵyndary jalpy somasy 10 mln 401 myń 948 teńge tólemaqy aldy. Jalpy alǵanda aksııa oıdaǵydaı júrgizildi. Bizge tapsyrylǵan barlyq qarý túrleri joıylady», deıdi oblystyq polısııa departamenti ákimshilik polısııa basqarmasynyń basshysy, polısııa podpolkovnıgi Jaıdarbek Quttybaev.
Quzyrly organ qyzmetkeriniń aıtýynsha, tapsyrylǵan qarý-jaraqtyń basym bóligi ekinshi sanatqa jatqyzylǵan. Ekinshi sanatqa negizinen atýǵa jaramdy, biraq bastapqy qalybyn joǵaltqan jáne aqaýlary bar qarýlar jatady. О́tkizilgen qarýdyń 149-y dál osy sanatqa engizilgen. Tehnıkalyq aqaýlarǵa baılanysty odan ári paıdalanýǵa jaramsyz nemese paıdalanýǵa qaýipti bolyp esepteletin 11 qarý polısııa qyzmetkerleriniń qolyna túsken. Bul qarýlar tıisinshe úshinshi sanatqa jatady.
Esterińizge sala keteıik, qarý men oq-dárilerdi zańsyz saqtaǵany úshin ákimshilik jáne qylmystyq jaýapkershilik qarastyrylǵan. Zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan azamattardyń is-áreketterinde qandaı da bir qylmystyq istiń quramy bolmasa, qylmystyq jáne ákimshilik jaýapkershilikten bosatylady.
Jambyl oblysy