Sońǵy kezderi soltústikqazaqstandyq tótenshe jaǵdaılar qyzmeti tilsiz jaýdyń aldyn alý jumystaryn qaýyrt júrgizýge májbúr bolyp otyr. Osy jyldyń 8 aıynda oblys boıynsha 2 300-ge jýyq órt bolǵan. Bul byltyrǵydan 9 paıyzǵa artyq. Sonyń saldarynan 30 adam qaza bolyp, 542 adam evakýasııalandy. Al órttiń epısentrinde qalǵan 181 adam qutqaryldy. О́rttiń kóbi turǵyn úılerden shyqqan.
Tótenshe jaǵdaılar jónindegi departamenttiń basshysy Ramıl Kamalovtyń aıtýynsha, búginge deıin 142 myń adam turatyn 53 myń aýlanyń órt qaýipsizdigi tekserilgen. Tekserister barysynda 5 myńnan astam órt qaýipsizdigin buzý deregi anyqtalyp, 1 200 adam ákimshilik jaýapkershilikke tartylǵan.
Tekseris jumystaryn júrgizýge oblys ákimi Qumar Aqsaqalov bekitken syzbaǵa sáıkes polısııa qyzmetkerleri, jergilikti atqarýshy organdar ókilderi men volonterler de tartylǵan. Áıtpese, osynsha aýqymdy jumysty jalǵyz tótenshe qyzmet ókilderi eńsere almaǵan bolar edi. Sonymen qatar órt qaýpin eske salyp, onyń aldyn alý isterin kórsetken 77 myńnan astam jadynamalar turǵyndar arasyna taratylǵan. Al BAQ-ta 1 025 aqparat jarııalanyp, 26 brıfıng ótkizilgen.
О́rtpen oınaıtyn kóbinese balalar men jasóspirimder. Olarǵa da tilsiz jaýdyń qaýpin túsindirý úshin 100-den astam ınteraktıvti jáne ashyq sabaqtar júrgizilgen. Buǵan 4 myńnan astam oqýshy qatystyrylǵan.
Oblysta 15 qyrkúıek pen 15 qazan aralyǵynda órt qaýipsizdigi boıynsha aılyq jarııalandy. Bul is-sharanyń barysynda áleýmettik álsiz toptardyń úı-jaılary baqylaýǵa alynyp, olardyń peshteri men murjalarynyń qaýipsizdigi tekseriledi. Jasyratyny joq, kóbine osyndaı toptardyń úılerinen órt shyǵyp jatady. Ásirese ashy sýǵa boı aldyrǵan jandar órt qaýpin aıaqasty ete beredi. Mine, sondaı turǵyn úıler arnaıy baqylaýǵa alynady. 2022-2023 jyldardaǵy jylytý maýsymynda oblys boıynsha osyndaı 4 448 úı esepke alynǵan. Olarda 12 560 adam turady, sonyń 5 myńnan astamy – bala. О́rt sóndirý qyzmeti jylytý maýsymy bastalǵanda iske qosylyp, ýly gaz nemese tútin shyǵa bastasa dabyl qaǵatyn arnaýly apparattardy da osyndaı úılerge ornatýda. 2020 jyldan beri sonyń 2 281-i ornatylǵan. Bul is Qyzyljar men Ýálıhanov aýdandarynda jaqsy jolǵa qoıylǵan, qazir osy ekeýinde mundaı apparattar tolyq ornatyldy. Petropavl qalasynda bul is sylbyr júrýde, osyny TJD bastyǵy arnaıy eskertetinin aıtty.
Basqa oblystarda bolmasa da Soltústik Qazaqstanda oblys ákimi Q.Aqsaqalovtyń arnaıy sheshimimen Petropavldaǵy qurylys-ekonomıkalyq kolledjinde «peshshi» mamandyǵyn daıyndaıtyn arnaýly kýrs ashylǵan. Munda pesh qalaýdyń qyr-syryn úıretetin arnaıy mamandar sabaq beredi. Ázirge bıyl alty adam ǵana peshshi mamandyǵyn ıgerip, sertıfıkat aldy. Qazir mundaıǵa kóp adam kúle qaraǵanymen peshti kez kelgen adam turǵyza almaıtynyn uǵý kerek. Tútin úıge taramas úshin ony dalaǵa tartý joldaryn tek mamandar ǵana anyqtaı alady.
О́rt qaýipsizdigin saqtaýdyń taǵy bir amaly – eski, qulaýdyń az-aq aldynda turǵan úılerdi súrý. Osyndaı úılerdegi peshter de ábden eskirip, órt qaýpin týdyratyny anyq.
Oblys ákimdigi órt sóndirý qyzmetine jiti nazar aýdaryp, bıýdjet qarajaty esebinen onyń tehnıkalyq múmkindigin arttyrýdy únemi nazarda ustaıdy. Sońǵy bes jylda ǵana 737 mln teńgege 32 arnaýly órt sóndirgish tehnıkalar alyndy. Tek byltyrǵy jyldyń sońynda 8 órt sóndirý avtosısternalary satyp alyndy.
Soltústik Qazaqstan oblysy