Aqtóbe qalasynda alǵash ret «Gúlder álemi» festıvali uıymdastyrylyp, kásiporyndar, jeke kásipkerler, oqý oryndary, balabaqshalar men qosymsha bilim beretin uıymdar ujymdary, saıajaı turǵyndary óz qoldarymen ósirgen jupar ıisti san alýan gúldermen alańdy kómkerip tastady.
Aqtóbe oblysynyń qurylǵanyna 90 jyl tolýyna arnap uıymdastyrylǵan osy tamasha sharaǵa qatysýǵa aldyn ala 156 ótinish túsken.
Gúldi jany názik, tabıǵatty súıetin jandar ǵana ósire alady. Tabıǵatty aıalaýǵa, óskeleń urpaqty kórkemdikti baǵalaýǵa úıretetin tárbıelik máni zor is-sharaǵa kógaldandyrýmen aınalysatyn mamandar da qatysyp, kelýshilerge tegin keńester berdi. Baý-baqsha ıeleri jaz boıy aıalap ósirgen gúlderin qumyraǵa salyp ákelip kórsetip, onyń jergilikti jaǵdaıda ósirilý erekshelikteri, kútimi týraly maǵlumattarmen tanystyrdy. Qala turǵyndary gúlder jármeńkesinen ózderi unatqan kópjyldyq gúlder kóshetteri men tuqymdaryn, baqsha ónimderin kóptep satyp aldy. Jergilikti ónerpazdar konsert qoıdy.
Festıval sońynda eń úzdik gúl ósirýshi atalymy boıynsha erekshelengen qatysýshylar marapattaldy. Aqtóbe qalasy ákiminiń orynbasary Aıbek Kópenovtiń aıtýynsha, ádilqazylar alqasyna eń úzdik gúl ósirýshini anyqtaý qıynǵa túsken. Ádemilikti nasıhattaıtyn qatysýshylardy yntalandyrý úshin úzdik gúl ósirýshiler toǵyz nomınasııa boıynsha marapattaldy. Qyrkúıektiń jaımashýaq kúninde uıymdastyrylǵan tamasha is-sharaǵa kelgenderge kóterińki kóńil kúı syılady. Jurtshylyq gúlder festıvalin jyl saıyn tap osy ýaqytta ótkizip turýdy usynys etti.
AQTО́BE