Jyl basynan beri «Býrabaı» Ulttyq parkiniń qyzmetkerleri Smart-Burabay sıfrly júıesin qoldanyp, 18 órttiń ormanǵa jaıylýyna jol bermeı, der kezinde sóndirdi, dep habarlaıdy Egemen.kz.
Bıyl Ulttyq park qyzmetkerleri ormandy órtten saqtaýǵa erekshe kóńil bóldi. Osy oraıda Smart-Burabay júıesi ınspektorlardyń jumysyn jeńildetip, ný ormandardy tilsiz jaýdan qorǵaýǵa zor septigin tıgizgen.
Mundaǵy «aqyldy» júıe bıik munaranyń basyndaǵy kameramen ormannyń aýmaǵyn baqylaıdy. Obektıvtiń «nazaryna» tútin nemese basqa da kúdikti kadr ilinse, sıfrly júıe ony qyzyl kontýrmen belgilep, Ulttyq parktiń táýlik boıy jumys isteıtin jedel basqarý ortalyǵyna jiberedi. Al ortalyqtyń kezekshi dıspetcherleri tótenshe qyzmetke habar jetkizedi.
Aıta ketsek, 129 myń gektardan astam jerdi alyp jatqan Ulttyq park aýmaǵynda osyndaı 13 munara bar. Sıfrly júıeniń kómegimen Aqylbaı (4 ret), Býrabaı (5 ret), Jalaıyr (1 ret) sııaqty barlyǵy 9 orman sharýashylyǵynda tutanǵan órt tez arada sóndirilip, jalyn bar bolǵany 0,5 gektar jerdi sharpydy.
Budan bólek, 8 aı ishinde tabıǵat qorǵaý zańnamasyna qaıshy 51 oqıǵa tirkelip, Ulttyq park aýmaǵynda saqtalatyn ereje 46 márte buzylǵany anyqtaldy. Tártip buzǵýshylardyń jeke bastary anyqtalyp, 440 myń teńgeden astam ákimshilik aıyppul tóledi.
Sondaı-aq tártip saqshylary zańsyz aǵash otaý (3), balyq aýlaý (1) jáne brakonerlikpen aınalysý (1) faktileri boıynsha 5 qylmystyq is qozǵaldy.