Soltústik Qazaqstan oblysyna jumys sapary barysynda Qazaqstan Respýblıkasy Kásipodaqtar federasııasynyń tóraǵasy Satybaldy Dáýletalın «Parasat» mektep-lıseıinde bolyp, aýyl mektebiniń oqý úderisindegi ınnovasııalarmen jáne ujymdyq sharttyq qatynastardyń júzege asyrylý barysymen tanysty.
Beskól mektep-lıseıi osydan 17 jyl buryn esigin aıqara ashty. Oqý memlekettik tilde júrgiziledi. 313 bala bastaýysh jáne orta bilim alady. Aýyldaǵy mektep bolǵanymen, oqý úrdisi mazmuny jaǵynan elordalyq orta bilim beretin úzdik oqý oryndarynan esh kem túspeıdi. Beskóldegi «Parasat» mektebiniń oqýshylaryn naqty ǵylymdardy meńgerýge arnalǵan ınteraktıvti taqta men vırtýaldy zerthanalar tańǵaldyrmaıdy.
Bilim oshaǵynyń dırektory Saǵat Eleýkınanyń aıtýynsha, mektep basshylyǵy ustazdardyń kásibı biliktiligin úzdiksiz arttyrýdy basty nazarda ustaıdy.
«Bizdiń aýyl mektebinde muǵalimderdiń biliktiligine mán beremiz. Búgingi tańda oqytýshylyq quramda 7 magıstr, 4 magıstrant, 2 sheber bar. Jas mamandarǵa erekshe kóńil bólip, olardyń kásibı ósýine jaǵdaı jasap jatyrmyz. Mektep oqýshylaryna sabaqty muǵalimder baıqaýynyń jeńimpazdary men júldegerleri júrgizedi. Biz mektep oqýshylary men túlekterimizdiń alǵan bilimderiniń nátıjesin maqtan tutamyz – olardyń kópshiligi grant ıegerleri», dedi «Parasat» dırektory.
Onyń áńgimesin bastaýysh kásipodaq uıymynyń tóraıymy Sábıra Ibraeva jalǵastyrdy.
«Mektepte 81 adam jumys isteıdi, onyń 76-sy kásipodaq múshesi. 2021-2023 jyldarǵa áleýmettik áriptes – mektep dırektorymen ujymdyq shart jasastyq. Aýdandyq, oblystyq jáne respýblıkalyq baıqaýlardyń jeńimpazdary – muǵalimderge eńbek demalystarynan basqa qosymsha demalys kúnderi beriledi. Mektep janynan mektep jasyna deıingi balalarǵa arnalǵan bilim berý ortalyǵy ashyldy, oǵan qabyldaý kezinde bizdiń mektep qyzmetkerleriniń balalaryna basymdyq beriledi», dedi kásipodaq komıtetiniń tóraǵasy.
QRKF tóraǵasymen birge Bilim jáne ǵylym qyzmetkerleri kásipodaǵy respýblıkalyq salalyq kásipodaq uıymynyń tóraǵasy Aıgúl Muqasheva áriptesterine kásipodaq uıymynyń muǵalim qaýymynyń quqyqtary men múddelerin qorǵaý maqsatynda atqaryp jatqan sharalary týraly aıtyp berdi.
«Bizdiń jumysymyzdyń negizgi baǵyty – quqyqtyq kómek. О́tken jyly kelisý komıssııalarynyń jumysyna qatysý arqyly 101 jeke eńbek daýyn sheshsek, 2022 jyldyń birinshi jartyjyldyǵynda 223 eńbek daýyn sheshýge kómektestik. 2021 jyly bizdiń kásipodaqtyń aralasýy arqyly jumys berýshiler tólemegen 1,5 mlrd teńgege jýyq qarajat muǵalimderge qaıtaryldy. Bul qosymsha júkteme úshin ústemeaqy jáne demalys aqysyn qaıta esepteý qorytyndysynda múmkin boldy. Bıylǵy jartyjyldyqta 1 mlrd 446 myń teńge qaıtaryldy», dedi A.Muqasheva.
Aýyl mektebindegi jıyndy qorytyndylaǵan Kásipodaqtar federasııasynyń tóraǵasy Satybaldy Dáýletalın áleýmettik áriptestik qaǵıdattaryn tabysty júzege asyryp kele jatqan bilim oshaǵy ujymyna alǵysyn bildirip, mekteptiń óskeleń urpaqty otansúıgishtik rýhta tárbıeleý jáne ár balanyń boıynda jan-jaqty, básekege qabiletti tulǵa qalyptastyrýdaǵy rólin atap ótti.
«Qazirgi mektep oqýshylary – halqymyzdyń, elimizdiń bolashaǵy. Memlekettiń odan ári damýy búgingi jas urpaqqa qandaı qundylyqtardy sińirýimizge baılanysty. Mektep qoǵamymyzdyń aldyńǵy jáne keıingi urpaqtarynyń rýhanı damýynyń qaınar kózi bolǵan jáne bolyp qala beredi. Muǵalimder qaýymy Kásipodaqtar federasııasynyń jalpy músheleriniń úshten birine jýyǵyn quraıdy, sondyqtan biz muǵalimderdiń múddesin alǵa bastyrý jáne olarǵa qolaıly eńbek jaǵdaılaryn jasaý sharalaryn qoldadyq jáne qoldaımyz», dep atap ótti S.Dáýletalın.
Jıyn sońynda QRKF tóraǵasy «Parasat» mektep-lıseıiniń ujymyna túrli tústi prınter syılady. Sondaı-aq salalyq kásipodaq uıymy arqyly mekteptiń úzdik muǵalimderine kásipodaq sanatorıılerinde sanatorlyq-kýrorttyq emdelýge joldamalar tabys etildi.
Soltústik Qazaqstan oblysy