Kásipodaq baģy jobasy osydan eki jyl buryn Prezıdent Qasym-Jomart Toqaevtyń 2020 jylǵy Joldaýynda aıtylǵan 5 jyl ishinde orman qoryna 2 mlrd-tan astam aǵash otyrǵyzý jáne eldi mekenderde 16 mln aǵash otyrǵyzý mindetin júzege asyrý maqsatynda Kásipodaqtar federasııasynyń bastamasymen qolǵa alynǵan bolatyn.
Qyzyljarda oblystyq kásipodaqtar ortalyǵynyń tóraǵasy Erik Nuraqaevtyń bastaýymen tuńǵysh Prezıdent saıabaǵynyń aýmaǵynda 3,17 ga jerge aǵashtar otyrǵyzylyp, oblystaǵy kásipodaqtardyń qamqorlyǵymen ósip keledi. Kásipodaq baģy dep atalatyn bul baq qazir qala turǵyndarynyń taza aýamen tynystap, raqat kúı keshetin mekenine aınalǵan.
Jýyrda Petropavlǵa kelgen jumys sapary barysynda Qazaqstan Kásipodaqtar federasııasynyń tóraǵasy Satybaldy Dáýletalın kásipodaq qozǵalysy ardagerlerimen jáne kásipodaqtyń jas múshelerimen osy baqta kezdesip, shyrsha otyrǵyzý aksııasyna qatysty.
«Bizdiń jobanyń maqsaty – eńbek ujymdarynyń múshelerin ekologııalyq máselelerdi sheshýge tartý. Saıabaqty abattandyrýǵa atsalysqan eńbek ujymdary egilgen shyrshalardyń saqtalýyna jaýapkershilikpen qaraıdy. Bastaýysh kásipodaq uıymdarynyń músheleri Kásipodaq baģy jobasyn qoldaıdy, onyń óskeleń urpaqty salamatty ómir saltyna baýlý maqsatynda qurylyp jatqanyn túsinedi jáne Petropavl qalasynyń ekologııasyn damytýǵa úles qosady», deıdi aýmaqtyq kásipodaqtar birlestiginiń mamany Janat Jumabek.
Osy ýaqytqa deıin kásipodaq uıymdaryna múshe jastar men ardagerlerdiń birlesken aksııasy barysynda Kásipodaq baģy úsh alleıasyna 105 sibir shyrshasy otyrǵyzyldy. Kásipodaq qozǵalysy ardagerleri osyndaı árbir aksııa jas urpaqqa qamqorlyq, kásipodaq uıymy músheleriniń, qarttar men jastardyń qarym-qatynasyn nyǵaıta túsetinin aıtady. Sonyń ishinde ómiriniń 40 jylyn óz aımaǵyndaǵy kásiporyn qyzmetkerleriniń quqyqtary men múddelerin qorǵaýǵa arnaǵan kásipodaq qozǵalysynyń ardageri Valerıı Lopatko ardagerler atynan kásipodaq kóshbasshylary men belsendilerge osyndaı jobany júzege asyrýǵa qatysýǵa shaqyrǵany úshin alǵysyn aıtty.
«Búgingi joba tek ekologııa ǵana emes, kásipodaqtyń urpaqtar sabaqtastyǵyn jalǵastyrýǵa úlken septigin tıgizedi», dedi ol. S.Dáýletalın kásipodaq ardagerleriniń jumysshy jastardy tárbıeleýdegi jáne kásipodaq qozǵalysynyń negizgi qaǵıdalaryn saqtaýdaǵy róli zor ekenin atap ótti.
Soltústik Qazaqstan oblysy