Astana qalasynyń ákimi Altaı Kólginov «Nur Besik» shaǵyn aýdanyna baryp, jergilikti turǵyndarmen aýdandy damytý máselesin talqylady. Bul týraly ákim óziniń Instagram paraqshasynda habarlady, dep jazady Egemen.kz.
«Qala turǵyndarymen turaqty túrde kezdesip turamyz. «Nur Besik» (Kóktal-1 eldi mekeni) shaǵyn aýdanynyń turǵyndarymen birlese aýdannyń odan ári damýyn talqyladyq. Qala turǵyndary áleýmettik nysandar (mektepter, balabaqshalar, medısınalyq ortalyqtar) qurylysy, káriz, úı qujattaryn rásimdeý, qosymsha avtobýstardy iske qosý, jyly aıaldamalar ornatý, aýlalardy, trotýarlardy abattandyrý, ınternet ótkizý sekildi ózge de máselelerdi kóterdi», dep jazdy qala basshysy.
Aýdan turǵyndary mańyzdy problemalardy buǵan deıin de qozǵap kelgen, olardyń basym bóligi, atap aıtqanda aýyz sý, káriz, jaryqtandyrý, gazdandyrý, jol jáne basqa da áleýmettik máseleler sheshimin tapty.
Elorda ákiminiń aıtýynsha, shaǵyn aýdandaǵy úılerdiń jartysynan kóbi kógildir otynǵa kóshirildi, kóshelerdi jaryqtandyrý jumystary júrgizildi, 14 kósheniń 13-i asfaltpen jabyldy, aýlalar abattandyrylyp, aıaldamalar ornatyldy.
«Qala turǵyndary kótergen máselelerdi eskere otyryp, atalǵan shaǵyn aýdanda mektep salý, qoǵamdyq oryndardy abattandyrý máseleleri josparǵa engizildi. Al balabaqsha boıynsha ınvestorlar tartamyz. Sol sııaqty medısınalyq ortalyqtar salamyz (qala turǵyndary tyǵyz ornalasqan Saryarqa aýdanynda), ınternet ótkizemiz. Bul jolǵy kezdesýde de qozǵalǵan problemalardy sheshý máselesin qolǵa aldyq, ony oryndaý kestesin jasaımyz. Eldi mekenderdi damytý máselesi Memleket basshysynyń baqylaýynda», dep jazdy elorda ákimi.