«Qazbattyqtarǵa» arnalǵan eskertkish

Memleketaralyq ýaǵdalastyqtarǵa sáıkes 1992 jyldan 2001 jylǵa deıin TMD-nyń ortaq shekarasyn Qazaqstan, О́zbek­stan, Qyrǵyzstan jáne Reseıdiń ortaq áskeri kúzetken bolatyn. Osy jyl­dary «Qazbat» atalǵan qazaqstandyq bitim­gershilik batalony quramynda 14 myń­ǵa jýyq azamat áskerı is-qımyldarǵa qaty­syp, tájik-aýǵan shekarasyn sepera­tıs­terden qorǵady. Áskerı qaqtyǵystar sal­darynan sol jyldary 46 qazaqstandyq qaza taýyp, 400-den astam adam jaraqat alǵan edi. Beıbit kúnde basyn qaterge tikken sarbazdardyń arasynda 300-den asa batysqazaqstandyq bolypty. Búginde solardyń 55-i Bórli aýdanynda turady. Aq­saı qalasynda «qazbattyqtarǵa» arnal­ǵan eskertkishtiń ashylýyna solar mu­ryndyq bolǵan.

– Tájik-aýǵan shekarasynda jaýyn­gerlik mindetin oryndap qaza tapqan 19 jasar jigitter boryshy men antyna adal bolǵan batyrlar edi. Olar – Táýelsiz Qazaq­stannyń alǵashqy ardagerleri boldy. Búgin biz osy monýmentti ashyp, el tynysh­tyǵy úshin janyn qıǵan erjúrek áskerı qyzmetkerlerdiń rýhyna taǵzym etemiz! Olardyń erligi men abyroıy qazirgi jastarǵa úlgi bolýy tıis! – dedi eskertkishtiń ashylý saltanatynda Bórli aýdanynyń ákimi Erkebulan Ihsanov.

Tájik-aýǵan shekarasyndaǵy áskerı is-qımyldar jáne áskerı qaqtyǵystar ardagerleri odaǵy Batys Qazaqstan oblystyq fılıalynyń tóraǵasy Álisher Ashýrmatov jańa eskertkishtiń jas urpaqty patrıottyq tárbıege tartatyn bir múıiske aınalatynyna senim bildirdi. Osy belginiń qoıylýyna qoldaý bildirgen Bórli aýdany basshysyna, B.Qaımoldıev, S.Qutymbetov, A.Baıandyqov, A.Enıchev, D.Aqmámbetov, O.Kýshev, N.Nıýdelchıev, V.Kravsov, E.Baıtas, K.Palhojaev jáne B.Temirbaevqa alǵys hat tabys etti. R.Tilekshıev pen A.О́tenııazov «Qazaqstan patrıoty» medaldarymen marapattaldy.

Jınalǵandar qaza tapqan jaýyn­gerlerdi bir mınýt únsiz eske alyp, estelik kompozısııaǵa gúl shoqtaryn qoıdy.

Batys Qazaqstan oblysy