Elordada «Saıası reformalardy júzege asyrýdaǵy azamattyq qoǵam ınstıtýttarynyń róli» atty dóńgelek ústel ótti. Dóńgelek ústeldiń jumysyna Aqparat jáne qoǵamdyq damý mınıstri Darhan Qydyráli, memlekettik organdar, JOO men elimizdiń ár óńirinen kelgen úkimettik emes uıym ókilderi qatysty.
Is-sharada azamattyq qoǵam ınstıtýttarynyń rólin nyǵaıtý máseleleri talqylandy. Dóńgelek ústel jumysyn Qazaqstannyń azamattyq alıansy uıymdastyrdy. Jıyn barysynda sóz sóılegen Aqparat jáne qoǵamdyq damý mınıstri D.Qydyráli azamattyq qoǵam ınstıtýttarynyń qoǵamdaǵy róline erekshe toqtaldy.
«О́zderińizge málim, Memleket basshysy Qazaqstan halqyna Joldaýynda eldegi qoǵamdyq-saıası reformalardyń jańa baǵytyn jarııalady. Myqty memleket ornatý úshin myqty azamattyq qoǵam ornaýy kerek. Elimizde sondaı-aq úkimettik emes uıymdarǵa erekshe mán berilip jatyr. Osy oraıda, zańnamalyq turǵyda azamattyq qoǵamǵa serpin beretin qadam jasaldy dep esepteımiz.
Sondyqtan Aqparat jáne qoǵamdyq damý mınıstrligi de bul baǵytta aýqymdy sharýa atqaryp jatyr. Onyń birinshisi zańnamaǵa qatysty. Qazirgi tańda birneshe zań jobasy qaralyp jatyr. Azamattyq qoǵam ókilderimen birlesip qujatty jetildiremiz», dedi D.Qydyráli.
Osy oraıda, «Qazaqstan Respýblıkasynyń keıbir zańnamalyq aktilerine qoǵamdyq birlestikter máseleleri boıynsha ózgerister men tolyqtyrýlar engizý týraly» zań jobasy tujyrymdamasynyń jobasy maquldanǵanyn aıta ketken jón. Oǵan qosa, «Qazaqstan Respýblıkasynyń keıbir zańnamalyq aktilerine volonterlik qyzmet, qaıyrymdylyq, memlekettik áleýmettik tapsyrys jáne úkimettik emes uıymdarǵa arnalǵan granttar máseleleri boıynsha ózgerister men tolyqtyrýlar engizý týraly» zań qabyldandy.
«Zańnamany jetildirý sheńberinde, úkimettik emes uıymdardy granttyq qarjylandyrý júıesi qaıta jasaldy. Eldegi úkimettik emes sektordy damytýdyń jańa vektoryn qamtıtyn azamattyq qoǵamdy damytýdyń 2020-2030 jyldarǵa arnalǵan tujyrymdamasy – basty strategııalyq qujat qabyldanǵan. Sonyń aıasynda birqatar aýqymdy joba júzege asyrylyp jatyr. Sol is-sharalardyń bel ortasynda Azamattyq alıans elge tanymal azamattardyń basyn qosyp júr», dedi D.Qydyráli.
Vedomstvo basshysy Qazaqstannyń azamattyq alıansy qoǵamdyq bastamalardy tıimdi úılestirip júrgenine nazar aýdardy. Sondaı-aq mınıstrliktiń bul baǵyttaǵy jumystarǵa qoldaý kórsetýge ázir ekenin jetkizdi.
Qazaqstannyń azamattyq alıansynyń prezıdenti Baný Nurǵazıeva atap ótkendeı, búginde Qazaqstan aldynda turǵan mindetter memleket pen úkimettik emes uıymdardyń ózara is-qımylyn kúsheıtýdi, azamattyq qoǵam ınstıtýttaryn júıeli túrde qaıta júkteýdi talap etedi. Reformalardy daıyndaý men iske asyrýǵa qoǵamdyq uıymdar men belsendilerdi neǵurlym keń tartý qajet.
«Memleket basshysy ashqan jáne qoǵam qoldaǵan el tarıhynyń jańa beti – jańa Qazaqstan, Ekinshi Respýblıka jańartylǵan Azamattyq qoǵamdy da talap etedi. Basqarýshylyq sheshimder qabyldaýǵa árkimniń barynsha tartylýyn qamtamasyz etý qajet, qazaqstandyqtar el úshin óz jaýapkershilik dárejesin túsinýi tıis. Biraq bul azamattardyń bilim jáne mádenı deńgeıin arttyrý qajet», dedi B.Nurǵazıeva.
Is-shara aıasynda yntymaqtastyq týraly birneshe memorandýmǵa qol qoıyldy. Dóńgelek ústel barysynda Adam quqyqtary jónindegi ýákil Elvıra Ázimova, Sybaılas jemqorlyqqa qarsy is-qımyl agenttigi tóraǵasynyń orynbasary Dmıtrıı Malahov, L.N.Gýmılev atyndaǵy Eýrazııa ulttyq ýnıversıtetiniń basqarma tóraǵasy-rektor Erlan Sydyqov, «Qazaqstan halqyna» QQ basqarma tóraǵasy Bolat Jámishev pikirin ortaǵa saldy.
Is-shara Qazaqstan Respýblıkasy Aqparat jáne qoǵamdyq damý mınıstrliginiń qoldaýymen «Azamattyq bastamalardy qoldaý ortalyǵy» KEAQ-nyń «Úkimettik emes uıymdardy qoldaýǵa arnalǵan respýblıkalyq azamattyq ortalyq» granttyq jobasy sheńberinde ótti.